Iyaqaqamba inhliziyo yenjini yeChiefs
KUQAQAMBA inhliziyo kuWillard “Salt & Vinegar” Katsande oyinjini yeKaizer Chiefs uma ecabanga ngobuhlungu ababuzwisa abalandeli bale kilabhu ebalwa nathandwa kakhulu eNingizimu Afrika.
IChiefs ibhekene nobunzima kulezi zinsuku njengoba abalandeli bayo bengeneme. Bakhala ngemiphumela engemihle etholwa yile kilabhu ngaphansi kobuholi bukaSteve “Mphathi” Komphela ongumqeqeshi. Bafuna ahambe, bathi usehluleke wancama ukunqobela le kilabhu izinkomishi ngakho kabasamudingi.
Lokhu bakusho ngoba sekuphele amasizini amabili iChiefs inganqobi nkomishi kwiPremier Soccer League (PSL). UKomphela uphume ngesamagundwane iChiefs iguqiswa yiBaroka FC ngo-2-1 kowe-Absa Premiership ngeledlule eMoses Mabhida Stadium, eThekwini.
UKatsande odlala esiswini kwiChiefs, uthi kuqaqamba inhliziyo uma ecabanga ngobuhlungu ababuzwisa abalandeli babo.
“Engikubone eMabhida kungizwise ubuhlungu, kungenze nga- bona ukuthi siziphula kangakanani izinhliziyo zabalandeli bethu. Kubuhlungu ukubona indoda ikhala ngenxa yokuthi kasikhiqizi imiphumela enkundleni. Kuzofanele siyilaphe le nto ngokushesha. Ngibuzwile ubuhlungu ngengikubone eMabhida,” kusho Katsande obewubuka nezihlwele lo mdlalo njengoba ebedonsa isigwebo samakhadi aphuzi.
Uqhube ngokuveza ukuthi yini abahlose ukuyizuza ngale sizini.
“Kangifuni ukuthembisa izinto ezinkulu kodwa into engangijabulisa emoyeni wukuthi sinqobe isicoco seligi nenkomishi eyodwa. Kungenzeka lokho uma sizobambisana. Nokho ingcabha ikhona nathi singabadlali ukuba sikhuphule amasokisi kakhulu kunakuqala.
“Ngiyacela angabekwa icala umqeqeshi wethu, nathi sinawethu amaphutha, sishweba amagoli siphinde sivumele izitha zihlohle amagoli ngakithi.
"Nginethemba lokuthi njengoba kunekhefu leFifa (Federation of International Football Association) nje, amaphutha ebesinawo sizobuya siwalungisile sesinyukele nakwelinye igiya,” kusho uKatsande.