Usulile kwiBay
Uselinde imvume yeNFD
UFAKE incwadi yokwesula kungazelele muntu uRoger “Mshefi” Sikhakhane ( osesithombeni) esigqikini sokuqeqesha iRichards Bay FC egijima kwiNational First Division (NFD).
USikhakhane udinsile izintambo emuva kokuba le kilabhu ithelwe nge-sibhaxu yiRoyal Eagles kuba ngu-3-2 ngeledlule isekhaya. Usule ngoLwesibili. Kuthiwa usefuna ukugxila kakhulu emabhizinisini akhe ahlinzeka ngezidingo ezahlukene uhulumeni okuthiwa uwabona eseqala ukushona phansi.
ILANGA lithole ukuthi uSikhakhane akazange alubhade ejimini yale kilabhu kusuka kuqale isonto kanti bekubhekwe lukhulu njengoba enyusele kwi-Absa Premiership iThanda Royal Zulu ngokuphela kwesizini edlule nokho ethengisele AmaZulu FC igunya lokudlala kulesi sigaba ikhala ngokungabi nabaxhasi bokubhekana nezindleko zokuba kusona.
Ebuzwa uSikhakhane ngalolu daba, akafunanga ukuluvuma noma ukuluphika, unxuse leli phephandaba ukuba lixhumane nezikhulu zeRichards Bay FC.
URichard “Mathousand” Makhoba oyiMenenja-jikelele yeRichards Bay FC, uzethusile ngesikhathi ebuzwa ngokusula kukaSikhakhane. Uthe usazoxhumana noSifiso “Jomo” Biyela ongumnikazi wekilabhu ozanywe yiLANGA izikhawu kodwa akaze atholakala. Leli phephandaba lithole ngemithombo yalo ukuthi izikhulu zeRichards Bay FC zisazama ukuncenga uSikhakhane ukuba aguqule umqondo, aqhubeke nalo msebenzi njengoba zithembele kuyena kwazise unesipiliyoni kulo mkhakha. Le kilabhu kubukeka izosizwa yikhefu leFederation of International Football Association (Fifa) ukulungisa izinkinga eziyihaqile.
Kuzo ezeNFD, uselinde amaphepha emvume yokusebenza kuleli uVladislav Heric waseSerbia oseqede konke neCape Town All Stars yaseCape Town. UHeric ungene ezicathulweni zikaDavid Kannemeyer okhonjwe indlela yizikhulu zale kilabhu. UHeric utshele ILANGA ukuthi usemagange ukuqala emsebenzini wakhe omusha.