Ziyanda izinkinga kwiBafana Bafana
Kuthunukale isilomo seSundowns kujinywa
ZIYA ngokwanda izinkinga kuStuart Baxter ongumqeqeshi weBafana Bafana njengoba kuvela ukuthi kuthunukale uMotjeka Madisha ambize ukuzovala isikhala sika-Eric Mathoho ohoxe ngenxa yesigwebo asinikwe yinhlangano ephethe ibhola emhlabeni, iFederation of International Football Association (Fifa).
IBafana izodudulana neBurkina Faso kowokuhlungela iNdebe yoMhlaba ngoMgqibelo ngo-15h00 eFNB Stadium, eSoweto.
Lo mdlalo kufanele noma kanjani iBafana iwunqobe ukuze ibuyise ithemba lokuya emqhudelwaneni wendebe yomhlaba ozokuba ngonyaka ozayo.
Nokho kubukeka kuzokuba nzima njengoba ibambe ibhuleki kwi-group D ngephuzu.
Kubukeka zanda izinkinga kuBaxter kunokuba zinciphe njengoba kuvela ukuthi uMadisha odlala emuva uthunukale idolo ejimini izolo ngoLwesithathu ekuseni.
Kuthiwa uqhubekile nokujima kodwa kucaca ukuthi udonsa kanzima.
Kuthiwa iBafana kufana nokuthi iphethe isigoga njengoba uma kungenzeka athole ithuba lokudlala kuzofanele alibophe idolo kumbe alijove. Lo mdlali uthunukala nje, ubizwe ukuzovala isikhala sikaMathoho iFifa emugixabeze ngesigwebo semidlalo emibili nenhlawulo ngenxa yekhadi elibomvu alithola iBafana ibhe- kene neCape Verde Island ekuhambeni. Kulo mdlalo iBafana idliwe ngo-2-1.
UBaxter uthi nakuba ebhekane nobunzima kuleli sonto kodwa akanalo uvalo ngomdlalo.
“Isonto siliqale kabi ngezinkinga, kulimala abadlali ngapha nangapha. Nokho ngiyajabula ngoba bakhombisa ukululama, kuzoshaya usuku lomdlalo sebeyimiqemane. Kulo mdlalo kuzodingeka izinsizwa ezizokwazi ukuyibamba ishisa. Kufanele siye kuwona silungise izinto kodwa uma singenakho ukuzethemba ngeke senze lutho kuzofana nokuthi siya empini singahlomile.
“Sidinga abantu abanethemba lokuthi sisengaya kule midlalo yendebe yomhlaba, hhayi abanokungabaza. Lo mdlalo unguwafa wafa noma kanjani kufanele siwunqobe kasikwazi ukujikela emuva. Lo mdlalo uzokuba nzima kodwa singawunqoba uma nje sizokwenza konke esikuhlelile ngaphandle kwezinkinga,” kusho uBaxter.
Ezingase zehle njengoju kubathandi bebhola bakuleli wukuthi u-Itumeleng Khune ongunozinti weBafana obenokuthinteka, usekuqinisekisile ukuthi ungumqemane futhi uwulungele umdlalo. No-Andile Jali ngokunjalo benoBradley Grobler, nabo abebenokuthinteka, kuthiwa bayalulama.
Khona manjalo kubikwa ukuthi kuyaqhubeka nokugqoza ukudayiswa kwamathikithi alo mdlalo okushone elangoLwesibili kusadayiswe angama-300 kuphela.
Lokhu sekuholele ekutheni igamfulwe intengo yawo isuka ku-R100 yaya ku-R50.