Kushode ozogadla bebanga ubukhosi
LNkosi isola uzalo lwayo ngokuyiphehlela amanzi amnyama
KUSHODE ozogadla kuqala ngoLwesihlanu kubangwa itafula okufanele kuhlale kulona inkosi yesizwe sakwaGumede KwaMashabane, eManaba, KwaMhlabuyalingana, enyakatho-mpumalanga yeKwaZulu-Natal.
Kusuke isidumo, kwaklolodelwana phambi kwamaphoyisa, kwajikijelwana ngamazwi phakathi kwezinhlangothi ezimbili “ezibanga” isihlalo sobukhosi. Kwenzeka lokhu nje, kunombango omkhulu phakathi kohlangothi olungoluhambisana neNkosi Sizabantu Gumede (92), noluhambisana nendodana yayo, uSipho Sunboy Gumede (43).
Ngokujwayelekile kuyaye kuhlale inkosi esihlalweni esisepulipiti, izinduna nomabhalane wayo. NgoLwesihlanu indodana yenkosi bekufanele iyothatha ihhovisi nesihlalo sikayise.
ILANGA like labika kabanzi ngokufakana kwalezi zinhlangothi enkantolo emuva kokuba kuthiwa abanye abantwana basendlunkulu yakwaGumede beqale umkhankaso wokugudluza iNkosi Sizabantu esihlalweni ngoba bethi isikhule kakhulu, bafuna kubekwe indodana yayo, uSipho.
NgoMsombuluko ILANGA libike kabanzi ngesigameko sokutholakala kwemithi ibhilwe yabhekiswa enyakatho, okuyilapho kubhekiswa khona abantu basendlunkulu uma sebeshonile. INkosi Sizabantu ichaze lesi sigameko njengobuthakathi. Ithe isola uzalo lwayo ngokuyiphehlela amanzi amnyama futhi lufuna ukuyigudluza ukuze kubekwe indodana yayo.
NgoLwesihlanu kucace bha ukungezwani kulezi zinhlangothi - phambi kwamaphoyisa abetheleke ngamaveni ali-13 ngaphakathi enkantolo yesizwe.
Ukuhhomuzela kuqale ngesikhathi kusenenguyazana phakathi kwenkosi yesizwe ebingene noMnu Mpiyakhe Mhlongo ongusotswebhu womkhandlu wesizwe, indodana yenkosi ebingene noMfu Zwelithini “Kruger” Gumede namaphoyisa abephuma eziteshini ezahlukahlukene KwaZulu-Natal.
ILANGA libe nenhlanhla yokungena kulo mhlangano. Elinye iphoyisa elisebenzela esiteshini sasoNdini, lithe banikwe umyalelo wokuba bayoqapha isimo kule nkantolo futhi bakhiphe nezinduna eziphazamisa ukusebenza “kweNkosi” Sipho. Kulapho iNkosi Sizabantu ikhwele yadilika kuMfu Gumede. Imtshele kwezikabhoqo ukuthi nguyena odunga umuzi wakwabo.
“Ngizoqala ngokubuza kini maphoyisa ukuthi njengoba ninemizi nje nemindeni eniyiphethe, kungenzeka yini ukuthi kufike isikhathi lapho kuzothiwa suka esihlalweni sekubekwa omunye phezu kwekhanda lakho.
"Kumanje nakhu kwenzeka lapha emzini kababa. Inkantolo lena iphethwe yimi hhayi omunye umuntu.
"Umfana wami lo (esho ekhomba indodana yakhe) ngiyamthanda kakhulu, kuphela nje uxova izinto ngoba elandela nangu uKruger. Kangikwazi nje nakukwazi wena, kawuzalwa lapha ekhaya.
"Okwesibili, kawusona nesakhamuzi lapha, umuzi wakho useMbazwana engikholwa wukuthi ufanele ukuyohlupha khona,” kusho inkosi ibhekise kuMfu Gumede. Okulandele lapho kube wukudungeka komhlangano ngesikhathi uMnu Mhlongo ebongela iNkosi Sizabantu. Inkosi iphume yabuyela ehhovisi layo lapho ibilindelwe yizinduna zayo ezili-13. Isizwe saKwaMashabane sinezigodi ezili-16. Izinduna zibhokele amaphoyisa zifuna ukwazi ukuthi ngubani owabizile.
Enye yezinduna isonge ngokuwathela induku amaphoyisa. “Kulungile ukuba ningibulale manje, ngifele inkosi yami. Nisuka ezindaweni zakwenu nizoxova isizwe ngokubiza laba bantu abangagunyaziwe ukusondela eduze kwenkosi. Kumanje kasisayazi imindeni yethu, sihlala sikhathazekile ngokuphepha kwenkosi yethu,” kusho le nduna.
Okulandele lapho, lezi zinhlangothi zibangisane ngokungena enkantolo, okuyilapho bekufanele kuqalwe umsebenzi wokuqulwa kwamacala nokubhaliswa kwabakhonzayo. Ngenxa yokusuka kwezidumo kuklolodelwana, kugcine kuphoqa ukuba lusale ngaphandle uhlangothi oluhambisana nendodana yenkosi.
INkosi Sizabantu ibilokhu ichiphiza izinyembezi. Kuningi obekushiwo ngamalunga omphakathi, ebhekise ohlangothini oluhambisana nendodana yenkosi.
UMnu Nkonzo Gumede oyingwevu yesizwe, uthe: “Kakukhona ukuthi sithulile kodwa sibheka lesi siqalekiso esehliselwe kulo mfana. Uyise usemthele ngezinyembezi, ukuba kuya ngami ngabe uyayiyeka yonke le nto ngoba lo muntu ahamba naye uyamdukisa futhi ungusomathuba. Enjalo nje akahlali lapha,” kusho le ngwevu.
UMfu Gumede osolwa ngokuxova unqandwe ngamaphoyisa efuna ukungena ngaphakathi enkantolo, uze wabizwa ngabanye abehamba nabo. “Ngeke mina ngivinjwe ngabantu abangazalwa ebukhosini. Mina ngizalwa phakathi endlunkulu,” kusho uMfu Gumede.
INkosi Sizabantu inqume ukumiswa okwesikhashana ukusebenza kwenkantolo yayo ngoba ithi inovalo lokuthi kungase kuchitheke igazi ngesizathu sokuthi kwasezigodini abantu bayaviva.
“Babodwa abangifonelayo bethi bacela ukuthi ngibanike imvume yezinsukwana zokuba bangene ehlathini emuva kwalokho babuye baqede ngalo msindo ngoba ngabantu abambalwa nje abawususayo. Kumanje sebeqale umkhuba wokungiloya, mabalinde banga- jahi sengizohamba emhlabeni. Nami ngamlinda ubaba wadlula, ngathatha izintambo zokuhola isizwe.
"Kumanje ngizokhipha ithimba lezinduna nabakwethu engibethembayo ukuba bayokhuluma nabakwaNxumalo eMbazwana ukuba bakhuze lo muntu osuka endaweni yabo azodala umsindo lapha ngoba mhla badinwa abantu, bayochithela igazi khona le eMbazwana,” kusho iNkosi
Sizabantu ikhihla isililo. Kumanje isimo sishubile kulesi sizwe kanti sesiphenduke intshumayelo nasemasontweni. Iningi lamalunga omphakathi kalikwemukeli ukubekwa kwendodana yenkosi ekubeni uyise esadla anhlamvana.