BAKHUTHAZE UBUNYE ABACULI BAKAMASKANDI
KWENZEKE okugajwayelekile emcimbini kamaskandi obizwa ngokuthi “Siqhatha Izinkunzi Maskandi Festival”, obungoMgqibelo ezinkundleni zezemidlalo Ugu Sports And Leisure Centre, ePort Shepstone, eningizimu yeKwaZulu-Natal, ngesikhathi izinkunzi zikamaskandi zingena zidedelana kungakashayi ngisho ihora lesihlanu ntambama. Phela sekwaba yinjwayelo emcimbini kamasikandi ukubanga ukuthi ubani ozovala umcimbi.
UMjikijelwa “iChalaha likaShafusa” Ngubane uzikhalele kubahleli bomcimbi ngokuthi uyafisa bengaphinde bawuqondanise neminye imicimbi ngoba lokho kuyabampintsha. Ukhale kakhulu ngesikhathi adlale ngaso obekungakashayi ngisho ihora lesihlanu esho ukuthi lesi sikhathi akajwayele ukudlala ngaso.
Udonse imicu embalwa bajabula abalandeli bakhe.
Bonke abaculi abebekhona bakhuthaze ubunye kubalandeli bakamasikandi bebancenga ukuba baseke bonke abaculi abasuke sebenikwe ithuba lokuba bangene estage.
UMthandeni “Gcokoma Elisha” Manqele naye ufike wakhuthaza ubunye.
Udlale izingoma ezimbalwa kwachazeka izihlwele, egqoke isudi yakhe empunga (grey).
UThokozani “Somnandi”Langa naye ube ngomunye ojatshulelwe kakhulu, eshaya ingoma apike kuyona uProfessor ethi “Iyababa” qede wakhuthaza abahleli bomcimbi ukuthi bangapheli amandla.
Ubekusho lokhu ngoba kubonakala ukuthi bebebancane abantu abahambele umcimbi.
Imithente nayo ihambe emagameni abanye abaculi ibonga abahleli bomcimbi bethi izandla ziyagezana kule ndima abahleli badinga amaciko kuze bahlele imicimbi ngokunjalo nabaculi badinga abahleli kuze kube nendawo abazodlala kuyona.
Uhlelo beluphethwe ngokucophelela uZimiphi “Zimdollar” Biyela ongumsakazi woKhozi noBhekizitha “Magaye” Cele owumsakazi weZwi Lomzansi.
Nabo bebebuye bayibhikle ingoma bejabulisa izihambeli.
Okhulumela abahleli bomcimbi uSifiso Ndimande uthe:
“Sijabule kakhulu ngabantu abafikile yize bebancane akunankinga ngoba umcimbi wethu wokuqala lo, nginesiqiniseko ngonyaka ozayo kuzoba kuhle kakhulu,” kuphetha yena.
BEZIBUYA EMCIMBINI KAMASKANDI IMVUNGE FESTIVAL