Kayinalo uvalo imeya
Lthi kwehliswa isithunzi sikamasipala
IHUBA ihubo le-African National Congress (ANC) elike laba sematheni iMeya yaseMzimkhulu, eningizimu yeKwaZulu-Natal, uMnu Mphuthumi Mpabanga.
Ithi kayinalo uvalo yize udaba lwehholo oluyindaba egudwini - ngaphansi kwalo masipala - selukuMvikeli woMphakathi, u-Adv Busisiwe Mkhwebane, ithi kakukho nokuncane okuphambene nomthetho okwenziwe wumasipala.
UMnu Mpabanga ukhulume engxoxweni ekhethekile neLANGA okokuqala ngalolu daba olusematheni njengoba luyamaniswa nokushona kobeyikhansela kulo masipala, uMnu Sindiso Magaqa, odutshulwe amahlandla angaphezulu kwangama-40 esemotweni yakhe namanye amakhansela, besesigodini sangakubo e-Ibisi ngoNtulikazi (July).
UMnu Mpabanga uthi konke lokhu kuphehlwa yipolitiki edla lubi esifundeni sabo iHarry Gwala futhi kuhleliwe ngoba abantu ababili abakhulume emngcwabeni kaMnu Magaqa, uMnu Les Situta noMnu Thabiso Zulu, bazikhulume lezi zinto ese- shonile uMnu Magaqa, engeke esakwazi ukuziphendulela kumbe afakaze kwabakushoyo.
“Okusixaka kakhulu wukuthi uMnu Magaqa ubesebenza namakhansela kumasipala, amanye awo abehambisana nombono wakhe ngepolitiki, kungani ebengalukhulumi kuwona lonke lolu lwazi abathi banalo, kunokuba asuke ayolukhuluma nabantu abakude le nomasipala wethu,” kusho uMnu Mpabanga.
Uthe konke lokhu okukhulunywayo ngomasipala wakhe - kokuthi kunezigidi zamarandi ezikhokhwe izinsuku zilandelana - kungamampunge okuhloswe ukwehlisa ngawo isithunzi sikamasipala nokuba kubulawe ubuholi bawo njengoba kwakhiwa isithombe sengathi ukufa kukaMnu Magaqa kusezandleni zabo.
“Yonke leya nto ekhulunywe emngcwabeni kaMnu Magaqa ingamampunge, futhi-ke thina kasinalo noluncane uvalo ngayo,” kusho uMnu Mpabanga.
Uvumile ukuthi zikhona izinkinga ngehholo nokuthi uma kushintshashintshwa izinkampani ezilakhayo, kuba nokusebenziseka kwemali (ngokweqile). Uthe akekho ongazi ukuthi isimo sepolitiki sishubile eHarry Gwala nokuthi abanye abantu bangenza noma yini ukuzama ukubheca abanye ngobende inyama bengayidlanga.
Eziphendulela uMnu Situta, uthe uma imeya iphika imikhonyovu, kungani umvikeli womphakathi ekumisile ukwakhiwa kwehholo?
Uthe uMnu Magaqa konke lokhu wakuphakamisa kaningana kodwa washaywa wukuthi izikhulu zikamasipala okubalwa kuzona nemeya bebeyicindezela le ndaba. Utshele ILANGA ukuthi kunemibhalo ewubufakazi lapho uMnu Magaqa ekuveza ukuthi akahambisani nalo mkhonyovu. “Ngebhadi-ke wukuthi ezinye zalezo zinto eziqoshiwe umasipala ngeke uziveze,” kusho uMnu Situta.
Usihlalo we-ANC esifundeni iHarry Gwala, uMnu Zamo Nxumalo, uthi nakuba bedumele ngokuthi omunye womasipala babo ungaphansi kophenyo olusezingeni eliphezulu lomvikeli womphakathi kodwa kuyingxenye yemigomo yabo ukulwa nenkohlakalo.