UKUBALULEKA KWENHLAMBULUKO KUBANTU NASEMINDENINI YONKANA
ABOMNDENI kaMfu Mhlongo baludlulisela ebukhosini baseLangeni lolu daba ukuze bathole ubuqiniso balezi zibonakaliso.
Emuva kwalokho, kwaphindwa kwabizwa umndeni wakwaMhlongo ukuba ulukhulume lolu daba kuzanywe ikhambi. Umndeni wanquma ukuba kwakhiwe ikomiti elalizoludingida - elalihlanganisa nezinduna zenkosi. Kwakhethwa uMnu Mbongeni Mhlongo (uMbhekaphansi) ukuba abe ngusihlalo walelo komiti.
Emhlanganweni wekomiti, inkosi yaseLangeni yacela ukuba kubizwe bonke abaphathi bezinhlangothi zamaNazaretha ukuze zimlekelele ezingxoxweni. Uhlangothi lwaseBuhleni lwalumelwe nguMfu Mathunjwa ongasekho noMvangeli Thishela Cebekhulu olwaseKuphakameni lwalumelwe nguMfu Mhlongo naye ongasekho. Ngempela-ke udaba lwakhulunywa, inkantolo yenkosi ya- yiseseNdulinde, ingakabi lapho ikhona namhlanje.
Ngenxa yokwehlukana kwebandla lamaNazaretha, kwaba nzima ukukhuluma lolu daba nokuthi khona-ke uma isizwe saseLangeni sihlawula sizohlawula ngaphi. Ngesu lakhe uShembe, kwabe sekuba nombuzo khona emhlanganweni othi, kambe uma umuntu efuna ukuxhumana nomnkantsha namathambo eNkosi yaseLangeni uMthengeni - eyayiphethe ngaleso sikhathi - angaxhumana nobani okunguyena ophethe ukhiye? Izwi lokuvumelana kwenkantolo yonke lathi usenkosini ebusayo manje, iNkosi uMgwavumeleni.
Lase liphinda izwi ngokufanayo ngokubuza kukasihlalo womhlangano, lathi kambe-ke uma umuntu efuna ukuxhumana nomnkantsha namathambo kaShembe (u-Isaiah “Mqaliwendlela” Shembe) lapho elele khona, angaxhumana nobani kulezi zinhlangothi esezaba khona emabandleni akwaShembe. Nakhona izwi labantu bonke ababesenkantolo lavumelana ngokuthi kunga- fanele axhumane nenkosi ekhona ngaphakathi eKuphakameni, iNkosi iNcoyincoyi (iNKosi Vukile Shembe).
Kwase kuvunyelwana-ke ukuthi noma ibandla selehlukana, kodwa makuxhunyaniswe le minkantsha emibili ngokusebenzisa ukuthi ngubani ophethe ukhiye weNkosi yaseLangeni uMthengeni nokuthi ngubani ophethe ukhiye weNkosi yaseKuphakameni, uMqaliwendlela. Kwabe sekucacela bonke abantu ababesemhlanganweni ukuthi intethelelo yamacala aseLangeni iseKuphakameni, eNkosini iNcoyincoyi.
Uma sekuxhunyanwa nesizwe-ke saseLangeni ukuba sibe yingxenye yale nhlambuluko, abanye abantu kabathandanga ngoba babekholwa wukuthi bona babengekho kwenzeka zonke lezi zinto ezibalwayo. Nakhona lapho banqotshwa yizwi lokuthi angathini umuntu ukuthi noma yena wayengekho kanti oyise noyisemkhulu babeyingxenye yala macala. Ekugcineni ubukhosi baseLangeni nesizwe sonke bahlangana bathenga izinkomo ezintathu,
eyokuqala kwaba ngeyesizwe ihlawulela amakhosi aseLanageni, eyesibili kwaba ngevela enkosini yakhona eLangeni nayo ikhalela amakhosi akubo nesizwe sayo eNkosini yaseKuphakameni, eyesithathu kwaba ngeyesizwe sizikhalela sona phambi kukaNKulunkulu. Lezi zinkomo zakhishwa ngowezi-2014 zayiswa eNkosini yaseKuphakameni ukuyoshweleza ngenxa yolaka lukaNkulunkulu olwase lwehlele isizwe saseLangeni.
Uma-ke sebezikhipha lezi zinkomo abaseLangeni, yathi iNkosi yaseKuphakameni kubona: “Namhlanje-ke icala leNkosi yaseLangeni nelesizwe saseLangeni, lithethiwe, kakuseyokuba khona lutho futhi oluyovela kuleli cala njengoba selihlawuliwe nje. Osekusele-ke manje kunye, wukuba ngihambe ngiye emakhosini ase-Langeni ngiyowahlambulula.” Ithi kodwa lokhu kufanele kube yisifundo “kinina nabantu bonke ukuthi inhlambuluko yinto ebaluleke kangakanani kubantu nasemindenini yonke nje emakhaya”. Yabatshela uku- thi bazinake izinhlambuluko zabantu abangasekho emakhaya. Yathi uma abantu behambe emhlabeni bengathethelelene, uyabuya lowo moya wabo ungene kwabaseleyo, kuqhubeke njalo ukungezwani.
Yathi kuhlala kuhlale uNkulunkulu ababulale bonke labo bantu, ukufa kuqala kulaba abanecala kulolo daba kodwa kugcine sekungena nakulabo abathi bona basohlangothini olungenacala. Nathi-ke njengabantu ababa nenhlanhla yokuthamela le nkonzo, singofakazi bala mazwi okubuyisana kwabantu njengalokhu kwaba yiwona myalezo omkhulu owawulethwe phakathi kwesizwe saseLangeni. Kula mazwi kawasalanga awothando nezeluleko zokuziphatha kwesizwe sakithi nokulwa nempi yemikhuba emibi esigubuzele lesi sizwe sakithi esimnyama. Kungalesi sizathu-ke iNkosi yaseKuphakameni, iNcoyincoyi, yayihambele emzini wamakhosi aseLangeni mhla ziyisi-6 kuLwezi (November) wezi-2016, ukuyogcwalisa iZwi layo lomusa wokuhlambulula amakhosi nesizwe saseLangeni kulawo macala. Mayibongwe iNkosi enkulu, iNkosi yamaZulu nomhlaba, Ameni!
Mayibongwe njalo iNkosi enkulu yamaNazaretha emileyo ngaphakathi kwamasango aphakemeyo omuzi wayo ongcwele waseKuphakameni, omi ingunaphakade, ozindonga zawo zinguNkulunkulu uqobo! Nathi siyahalalisa, siyadumisa nabaseLangeni abasemhlabeni nabasemoyeni ngaleyo nhlanhla yokuthethwa kwamacala abo nokugezwa, bathethelelwe bona nezizukulwane zabo. Ameni! Mshumayeli Thetha Ngiba
NAKHONA LAPHO BANQOTSHWA YIZWI.