Ukhala "ngokuqhwagwa" izaguga
Uthi uyilandele yonke imigudu wathola namaphepha amgunyazayo
UYAVEVA owesifazane waseVillage, eChatsworth eningizimu yeTheku onekhaya labadala ophucwe izaguga ekubeni enamaphepha amgunyaza ukuba enze lo msebenzi.
UNkz Ntombifuthi Makhathini weSibonelo Community Care Centre, uthi useze walahla ithemba lokuthi zizobuyiswa izaguga ebezihlala kuleli khaya njengoba etshelwe ukuthi zithathwa ngoba engenayo indawo yokuziphekela yize ubeseqede iminyaka eminingi enza lo msebenzi.
Uthi kuyamethusa lokhu ngoba isitifiketi unaso futhi walandela yonke imigudu efanele ngaphambi kokusithola. Uthi ufisa ukuthola uxhaso njengoba ethi ushaya iphakethe lakhe uma kumele athenge ukudla noma angcwabe lezi zaguga uma kwenzekile kwakhona esishonayo.
ILANGA lihambele le ndawo ngoLwesihlanu lafica uNkz Makhathini nalabo asebenza nabo bematasa ngomsebenzi. Uvezele leli phephandaba ukuthi useneminyaka engaphezulu kwengama 20 enza lo msebenzi njengoba eqale ngokugcina izintandane.
Uthi nakhona lapho uyekiswe ngosonhlalakahle abafike bashaqa izingane sezikhulile ezinye sezifunda omatikuletsheni bahamba nazo. Uthi okumphatha kabi kakhulu wukuthi ezinye zike zabuya zizozikhalela kuyena seziphenduke imihambima ezinye zibhema i- whoonga ekubeni zithathwe kuyena zifunda.
“Ngiqale ukwenza lo msebenzi ngonyaka we-1997 ngisaphekela abantu abahlala emgwaqweni.
"Kuhambe isikhathi ngenza lo msebenzi kwathi ngowezi-2004 nganikezwa le ndawo engisebenzela kuyona. Ngiwagcwalise wonke amaphepha ngoba ngifuna ukuthola isitifiketi sokuba ngigcine izingane eziyizintandane ngoba le nto ifana nobizo kimina.
"Ngisitholile isitifiketi ngaqala ngazigcina izingane. Kuthe ngowezi-2012, kwafika osonhlalakahle abangitshele ukuthi basuka eChatsworth bazithatha izingane ngoba bethi indawo yami kayikho esimeni. Ngizamile ukuyilwa leyo ngagcina ngehlulekile ngabe sengifuna amaphepha okuba ngikwazi ukugcina nezaguga.
"Nawo ngigcine ngiwatholile ngaqhubeka ngazigcina ngoba bezikhona ebezifika ngesikhathi ngisagcina izintandane. Bekufika izaguga ezisuka kuzona zonke izinkalo zalapha KwaZulu-Natal okubalwa oNquthu, Msinga, Nongoma nakwezinye izindawo.
"Kuthe konke kusahamba kahle, babuya osonhlakahle kulo nyaka bazishaqa izaguga bengitshela ukuthi indawo yami kayikho esimeni esikahle sokuba ngigcine izaguga.
"Okungiphathe kabi wukuthi sengineminyaka eminingi ngenza lo msebe- nzi kungekho nkinga futhi befika osonhlalakahle,” kusho yena.
Uthi akufisayo wukuba abuyiselwe izaguga ngoba ezinye zazo zike zamthinta zimazisa ukuthi kazihleli kahle lapho zigcinwe khona. Uthi lokhu kuyamkhathaza ngoba kuyena bese zifana namalunga omndeni wakhe.
“Ngisho zishonile yimina engikhipha imali yomngcwabo ngizifihle. Lokhu ngikwenza ngoba sebefana namalunga omndeni. Ngesikhathi bezithatha izaguga ngigcine ngiphoqeleka ukuba ngehlise isibalo sabantu abebengisebenzela. Ngiyacela ukuba uhulumeni ungenelele kulolu daba,” usho kanje.
Okhulumela uMnyango wezokuThuthukiswa koMphakathi KwaZulu-Natal, uMnu Vukani Mbhele, uthi izaguga zisuswe kule ndawo ngoba uNkz Makhathini engafuni ukulandela imigomo ephathelene nokunakekela abantu abadala yize anikezwa yona. Uthi umnyango ubone kungcono ukuba uzisuse lezi zaguga uyozibeka esikhungweni esisemthethweni ukuzivikela. Uthi akulona iqiniso ukuthi indawo kaNkz Makhathini isemthethweni.
“Ngesikhathi kulandwa izaguga, ezinye bezibuthaka kangangoba zihanjiswe ngama-Ambulensi,” kusho yena.
Uthi uNkz Makhathini ukhononda ngoba bekukhona akuzuzayo emalini yazo yempesheni ngoba ubezikhokhisa njengoba isikhungo sakhe singabhalisiwe.
Uthi njengoba zisesikhungweni esisemthethweni, izaguga ziyanikezwa ingxenye yemali yazo yempesheni ukuze ziyisebenzise ngendlela ezithanda ngayo.
ILANGA libe selibuyela kuNkz Makhathini okuqinisekisile ukuthi isifiketi sakhe bese siphelelwe yisikhathi kodwa usesivuselelile.