Abuyele kwasifuba kowerekhodi lakuleli
Ukhale ngamajika nomoya eshiywa emjahweni
AMATHE abuyele kwasifuba kumgijimi odumile waseNingizimu Afrika ehluleka encama ukuba ngowokuqala ukunqoba iFNB Durban 10k CitySurf Marathon ebiyizolo ngeSonto eqale yaphinda yaphelela phambi kwaseMoses Mabhida Stadium, eThekwini.
Ngaphambi kwalo mjaho, uStephen Mokoka odabuka eMahikeng, eNorth West, utshele leli phephandaba engxoxweni engashicilelwanga, ukuthi nakanjani uzowunqoba.
Uthembise ukuphula irekhodi lakhe laseNingizimu Afrika kwi10km elingu-27:38 alibeke ngowezi-2015 eManchester, e-England.
Nokho kakuhambanga ngokwamagama akhe njengoba ebuke izithende zikaJoshua Chetegei waseKenya oshaye intambo ngesikhathi sika-27:28 kwathi isibili kwaba nguStephen Kissa waseUganda ngesika:28:04, isithathu kwaba nguJulien Wanders waseSwitzerland ngesika-28:12. UMokoka ugcine engene endaweni yesine ngesikhathi sika-28:34.
UJoshua utshele ILANGA emuva kwalo mjaho ukuthi ubevele enokukhulu ukuzethemba ukuthi nakanjani uzowunqoba lo mjaho kwazise umzila nesimo sezulu kumphathe kahle kakhulu.
UKissa ukhale ngomoya namajika amaningi emzileni, wathi yikhona kanye okwenze wagcina eselandela izithende zikaJoshua.
Nokho uthi uzobuya ngelikhulu ishodi ngonyaka ozayo ezeseka ngokuthi uwubone kahle umzila.
“Nakanjani ngizobuya ukuzolwela lesi sicoco ngonyaka ozayo. Izinga beliphezulu kakhulu kulo mjaho njengoba bekuhanjwa ngesivinini esikhulu. Nokho ngizobuya ngizicije kahle kakhulu ngonyaka ozayo,” kuthembisa uKissa.
Kulo mjaho abasubathi baseNingizimu Afrika kabalibonanga elidlalayo kwabangaphandle njengoba nasesigabeni sabesifazane ubhedu ludliwe nguMercyline Chelangat wase-Uganda ngesikhathi sika-31:37.
Lo mgijimi uncome kakhulu indlela obeku-hlelwe ngayo lo mjaho obalwa nekhokha kahle kakhulu njengoba izingqwele zigoduke no-R25 000 kubo bobubili ubulili.
“Ngizobuya ngonyaka ozayo ngizovikela isicoco sami. Njengoba ngiqeda lo mjaho sengiyolungiselela ukubamba iqhaza kwi-15km yaseNetherlands nayo engibheke ukuyinqoba,” kusho uMercyline.
Imiphumela yeFNB 10km esigabeni esivulelekile kwabesilisa imi kanje: 1.Joshua Cheptegei (27:28) 2.Stephen Kissa (28:04), 3. Julien Wanders (28:12), 4.Stephen Mokoka (28:34), 5.Elroy Gelant (29:11), 6.Joel Mmone 29:31), 7. Phillimon Mathiba (29:38), 8. Mbongeni Nxazozo (29:42), 9. Thabang Mosiako (29:46), 10.Morris Gachaga (29:46).
* Eyasebesifazane: 1.Mercyline Chelangat (31:37), 2.Paskalia Chepkorir (31:47), 3.Dorcas Tuitoek (32:11), 4.Veronicah Nyaruai (32:55), 5.Dom Scott-Efurd (33:26).