UNQUME UKUNGAXHAMAZELI ESHIYWA NGUMLOLONGI
SITHUKILE isikhulu seRichards Bay FC esale ingenamqeqeshi kusula isigubhukane uRoger Sikhakhane ngoLwesibili esiphuma kulona.
USifiso “Jomo” Biyela oyisikhulu seBay FC utshele ILANGA ukuthi unqume ukuqhubeka nabaqeqeshi abebesiza uSikhakhane. Laba baqeqeshi nguJomo Ntuli, uNkosenhle Ngema noVeli Magagula azwakalise ukuthi yibona abazoqhubeka nokuhola le kilabhu emidlalweni yayo ezayo yeNational First Division (NFD).
“Ingehle ngaphezulu eyokushiya kukaSikhakhane. Yingakho kube nzima ukuqalaza umqeqeshi omusha. Ngithathe isinqumo sokungaxhamazeli, ngivele ngiqhubeke nabaqeqeshi abebemsiza. Kangifuni ukuthi ikilabhu inyomfeke ngokuthi ngilande umqeqeshi ozofuna ukufika nabadlali bakhe.
“Abaqeqeshi abakhona bayazazi izinhloso zekilabhu. Nginethemba lokuthi bazokwazi ukuqhubeka nokwakha kahle ikilabhu njengoba isanda kusungulwa. Ngijabule kakhulu sihlula AmaZulu FC ngo3-2 kowobungani ngoMgqibelo. Lo mphumela ngethemba ukuthi uzokwenza abadlali bangagebisi amakhanda kodwa bawavuse yize engasekho uSikhakhane,” kusho uBiyela okugcizelele ukuthi ufuna ukuzinza nje kuphela kulesi sigaba kule sizini akakubhekile ukulwela ukusinqoba.
IBay FC izobhekana neStellenbosch FC koweligi ngoMgqibelo ngo-15h30 e-Athlone Stadium, eCape Town. Uthi ubheke umphumela omuhle kulo mdlalo njengoba ezakhe zivamise ukudlala kahle uma zihambile.