Injabulo iphenduke usizi kwiBafana
Ukunqoba kweSenegal kugulise uBaxter
INJABULO iphenduke yaba muncu kuStuart Baxter ongumqeqeshi weBafana Bafana kunqoba iSenegal esiphenduke isithiyo sokugcina emizamweni yaleli qembu laseNingizimu Afrika yokungena emqhudelwaneni weNdebe yoMhlaba ozokuba ngonyaka ozayo eRussia.
IBafana iguqise iBurkina Faso ngo-3-1 kowokuhlungela iNdebe yoMhlaba ngoMgqibelo ntambama eFNB Stadium, eSoweto, kwathi ebusuku iSenegal yaqumba phansi iCape Verde Island ngo-2-0. Amagoli eBafana abhajiswe enethini nguPercy Tau oqokwe njengomdlali ovelele, uThemba Zwane noSibusiso Vilakazi.
UBongani “Ben 10” Zungu akawuqedanga lo mdlalo njengoba ekhishwe ngekhadi elibomvu. UBaxter uqede lo mdlalo wabe eseyomincela ukuthi iCape Verde neSenegal badlale ngokulingana njengoba nabo bebebhekene ngawo uMgqibelo ebusuku.
Ukudlala ngokulingana kwala maqembu bekuzokwandisa amathuba elakuleli okungena kule midlalo yomhlaba.
Kubukeke zihamba kahle izinto ngesiwombe sokuqala njengoba umdlalo weSenegal neVerde uye ekhefini zibambene ngo-0-0.
ISenegal ibuye ngesiwombe sesibili yahlohla amagoli amabili yagoduka namuphuzu amathathu. Ukunqoba kweSenegal kuthwese elakuleli omkhulu umqansa. ISenegal yiyona esiqhwakele kwigroup D ngamaphuzu ayisi-8 emidlalweni emine.
Ilandelwa yiBurkina Faso enamaphuzu ayisi-6 emidlalweni eyisihlanu, kube yiCape Verde ngayisi-6 emidlalweni eyisihlanu, bese ibhuleki ibanjwa yiBafana ngamaphuzu amane emidlalweni emine.
IBafana neSenegal basalelwe yimidlalo emibili abazobhekana kuyona bobabili, bese kuthi iBurkina Faso neCape Verde bona basalelwe ngowodwa.
Ukuya kweBafana kule midlalo yomhlaba kulele ekutheni ihlule iSenegal kabili bese ingena kakukhathalekile ukuthi kwenzakalani koweBurkina Faso neCape Verde.
Nokho kubukeka kuzokuba wumqansa njengoba iSenegal isidedela isibhaxu ekhaya. Ithuba lona lisekhona yikhona nje ukuthi iBafana idumile ngokuphoxa ezimweni ezinjena.
UBaxter uthi ukunqoba kweSenegal kwenze izinto zaba nzima.
“Kuzofanele sishintshe uhlelo kule midlalo emibili esisalele neSenegal. Kuzofanele sikhohlwe wukuthi abanye benzani sizenzele thina umsebenzi.
"Okuhle nje wukuthi siwunqobile lo mdlalo weBurkina Faso futhi siwunqobe kahle kakuzange kube nazinkinga. Ukuba badlale ngokulingana besizosizakala kakhulu kodwa-ke ibhola linjalo kufanele uzenzele wena umsebenzi ungabheki abanye,” kusho uBaxter.
IBafana izogijima neSenegal ngoLwesihlanu lomhla zili-10 kuLwezi (November) ngo-19h00 ePeter Mokaba Stadium, ePolokwane, bese ngoLwesibili lomhla zili-14 enyangeni efanayo la mazwe ashukane kowokugcina ozokuba seSenegal.