UFUNA UKUKHULUNYELWA YIMISEBENZI KWI-ARROWS

UMGADLI weLamontville Golden Arrows osemncane uhlela ukuphoqa uClinton Larsen ongumqeqeshi wale kilabhu ukuba ambophele esikimini.

ILamontville Golden Arrows Reserves iguqise iFree State Stars Reserves ngo-2-0 koweMultiChoice Diski Challenge (MDC) ngoMgqibelo ntambama ePrincess Magogo Stadium, KwaMashu.

USibusiso “Y2K” Sibeko nguyena ovule inkundla elibeka enethini, kwabuya uSanele “Chenene” Mathenjwa nelakhe esezoshayelela isipikili sokugcina ebhokisini lokungcwaba izitha.

USibeko ongumgadli we-Arrows Reserves odabuka eLamontville eningizimu yeTheku, ukhombise ukuvuthwa kulo mdlalo njengoba ubegadulisa kanzima izitobha zeFree State Stars Reserves. Uzithola edlala eqenjini elincane nje, yingoba isikimu usizwa ngendaba eqenjini elikhulu.

Lo mdlali ekhuluma neLANGA emuva kwalo mdlalo, ulitshele ukuthi uhlose ukuhlohla inqwaba yamagoli ukuze uLarsen ezohluleka wukumziba.

“Lo mdlalo ngiwujabulele kakhulu, ubuseqophelweni eliphezulu. Ngijabule ngoba ngishaye negoli.

"Kodwa-ke inhloso yami vele wukuthi ngihlohle inqwaba yamagoli ukuze umqeqeshi ezongiqalisa imidlalo eqenjini elikhulu. Iyasiza le midlalo ngoba isenza sihlale sikulungele ukudlala esikimini esikhulu.

“Phela ebholeni kwenzeka noma yini ngakho le midlalo isiza ezimweni ezinjalo lapho kulimala kumbe kukhona othola ikhadi eli- bomvu esikimini esikhulu. Uma ubizwa kuyabonakala ukuthi ubudlala.

"Kodwa okwamanje kufanele sizame ukulwela ukubuyisa isicoco sethu (seMDC) esisinqobe kumasizini amabili edlule. Singakwenza lokho uma nje sizoqhubeka nokudlala ngokuzinikela,” kusho uSibeko.

Isiyonke imiphumela yeMDC imi kanjena: Polokwane City Reserves 2, Maritzburg United Reserves 2; Mamelodi Sundowns Reserves 3, Kaizer Chiefs Reserves 2; Bidvest Wits Reserves 0, SuperSport United Reserves 1; Golden Arrows Reserves 2, Free State Stars Reserves 0; Orlando Pirates Reserves 2, Ajax Cape Town Reserves 0; AmaZulu Reserves 1, Chippa United Reserves 1; Platinum Stars Reserves 1, Bloemfontein Celtic Reserves 3; Cape Town City FC Reserves 0, Baroka FC Reserves 1.

ISITHOMBE NGABE: BACKPAGEPIX NGUSIBUSISO Sibeko weGolden Arrows odlala esigabeni seMultiChoice Diski Challenge (MDC) oshaye elinye lamagoli okunqobe ngawo le kilabhu yehlula iFree State Stars ngo-2-0 kuso lesi sigaba emdlalweni obusePrincess Magogo Stadium, KwaMashu.