IDowns igwema inkohlakalo ngaboSuthu
Ichazekile ngabadlali beGlenwood Boys
IBHUNTSHILE imizamo yeMamelodi Sundowns yokuhlwitha abadlali beGlenwood Boys ehlulwe yiLesoaona yaseFree State ngo-2-1 kowamanqamu weMcDonald U/14 Cup ngoMgqibelo eSinaba Stadium, eDaveyton, eGoli.
UMandla Mazibuko osezinhlakeni zokuthuthukiswa kwabadlali kwiSundowns, ubehambele lo mqhudelwano ngenhloso yokuhlwaya abadlali. Uthi uchazeke kakhulu ngabadlali beGlenwood. Uthi ngabe kukhona abadlali abahlwithe ngokushesha kulesi sikole kodwa wavinjwa wukuthola ukuthi banezinkontileka namaZulu FC asanda kukhuza ibuya kwiAbsa Premiership.
“IGlenwood yisikole esihleleke ngendlela exakile. Kunenqwaba yabafana abangichazile kulesiya sikole. Inkinga wukuthi banobuhlobo obude namaZulu. Lokhu ngikuthole ngemuva kokubuza kabanzi ngabo. Manje ngeke sihambe uSuthu ngemuva ngoba lokhu kungabe kuyinkohlakalo.
“Siwancoma kakhulu AmaZulu ngokusiza laba bafana. Nokho-ke bakhona engizobathatha ngibafake enkulisa yeSundowns ngoba baningi abadlali abakhombise ikhono elibabazekayo kulo mqhudelwano. Izifundazwe sezithuthuke kakhulu manje kunobhutshuzwayo wezikole.
“Ukukhishwa kweClapham yaseTshwane kungidwebele isithombe sokuthi seliphezulu kakhulu izinga lebhola lezikole,” kusho uMazibuko odume kakhulu eSchool of Excellence ekhiqize inqwaba yabadlali. IClapham inqobe iCopa Coca Cola U/15 Cup ngeledlule eFree State ihlula iJL Dube yaseNanda enyakatho yeTheku ngo-2-1 kowamanqamu. Lesi sikole sinobudlelwano neDowns okwenza sidlale ibhola elisezingeni eliphezulu.
URonnie Moroka ololonga isikwati soSuthu esigijima kwiMultiChoice Diski Challenge (MDC) ukuqinisekisile ukuthi abadlali beGlenwood ngabale kilabhu.
“Labo badlali bakhokhelwa wuSuthu imali yokufunda. Banezinkontileka nekilabhu. Sinobuhlobo obude nalesiya sikole. Sijabulile ngoba bakwazile ukufinyelela kowamanqamu. Ukwenza kahle kwabo kulo mqhudelwano kwenza sibone ukuthi liqhakazile ikusasa loSuthu. Inhloso yethu wukuthi bajwayele ukudlala imiqhudelwano ehlukene ukuze baqine ukhakhayi ngaphambi kokuba bazodlalela ikilabhu ngokugcwele,” kusho uMoroka.