USHIYE USANA OWELWE UDONGA
UYABALISA umndeni wowesifazane waseMlaza, eningizimu yeTheku, oshone emuva kokudilikelwa wudonga ngoLwesibili esibhedlela iPrince Mshiyeni kulona leli lokishi.
Umndeni kaNkz Sizakele Chala (29), uthi kusenzima ukwamukela ukudlula kwakhe emhlabeni njengoba eshiye ingane enezinsuku eziyisi-7 izelwe.
Kubikwa ukuthi umufi ushona nje, ubeyokwenzela ingane isitifiketi sokuzalwa kanti uzokwehlelwa yilo mshophi esephindela ekhaya. UMnu Muzi Chala onguyise kamufi, uthi kusebuhlungu okwehlele umndeni wakhe njengoba indodakazi yakhe ishone isizogoduka.
Uthi uyacabanga ukuthi ivinjezelwe yimvula yakhosela kulolu donga kanti yilona oseluzothatha umphefumulo wayo.
Uthe babonga uMdali ngoba umzukulu wakhe - ingane kaNkz Chala - isindile, kuyimanje isesibhedlela. UMnu Sgwili Mvula wasePort Shepstone, ogwini oluseningizimu yeKwaZuluNatal kodwa oseMlaza ngokomsebenzi - obeseduze kukaNkz Chala ngesikhathi sesigameko - uthi namanje akazazi ukuthi usinde ka- njani. Uthi bese kuphelile abekuyele kulesi sibhedlela ngesikhathi kuqala imvula enamandla emvalele wangakwazi ukuhamba. Uthi uncike odongeni olukulesi sibhedlela ngenhloso yokukhosela yena nabesifazane ababili (abashonile).
Izolo ongqongqoshe beminyango ehlukene bahambele izibhedlela nezindawo ezikhahlanyezwe yilesi siphepho ukubheka umonakalo owenzekile. Baqale eKing Edward, okungesinye salezo eziphazamisekile ngoLwesibili njengoba lapho kulindelwa khona amafayela kugcwale amanzi kwaphoqa ukuba abantu balinde phandle.
UNgqongqoshe wezeMpilo KwaZulu-Natal, uDkt Sibongiseni Dhlomo, uthe zikho- na izinhlelo zokulungiswa kwalesi sibhedlela njengoba sesisidala kakhulu, yize ethe ngeke sibe seqopheleni eliphezulu ngoba kunezinhlelo zokuba sakhiwe kabusha eCato Manor, eningizimu yeTheku.
Uthi bazosilungisa kuqhubeke ukusebenza. Ungqongqoshe wezokuThuthukiswa koMphakathi KwaZulu-Natal, UNkk Weziwe Thusi, ugxeke abasabalalisa izithombe ezingamanga ezinkundleni zokuxhumana. Uthi izikole ezikhahlamezekile KwaZulu-Natal zingama-42. Imeya yeTheku uNkk Zandile Gumede, ithe kunesamba semali esibekiwe, esibhekele ukunwetshwa kwamapayipi ahambisa amanzi ukuzama ukugwema lokhu.