Lubuyela enkantolo olombhishobhi
Walahlwa ngamacala angama-574 okukhwabanisa
LUBUYELA eNkantolo yamaCala obuGebengu obuHleliwe eThekwini kusasa ngoLwesihlanu udaba lwesigwebo esiyindida esinikwe uMbhishobhi Jabulani Mvubu olahlwe ngamacala angama-574 okukhwabanisa ngoNtulikazi (July) nonyaka.
Ukubuya kwaleli cala, obese ku- catshangwa ukuthi liphelile, kudalwe yindida yesigwebo esingamahora ayizi-7 000 esikhishwe yimantshi, uNkz Christo Mazibuko, mhla zizine kuNtulikazi. Lesi sigwebo imantshi isichaze yathi uMbhishobhi Mvubu uzodonsa izimpelasonto ejele kuphela kuthi phakathi nezinsuku akhululeke ebe ekhokhela izisulu imali ewu-R20 000 njalo ngenyanga zize ziphele izisulu azikweleta imali elinganiselwa ku-R1.6 million. Lesi sigwebo kasisebenzanga emuva kokuba izikhulu zejele zicele ukuba imantshi isicacise kahle, okudale ukuba udaba lubuyele enkantolo.
UNkz Mazibuko ukhale ngokungahambisi kahle kukasonhlalakahle obejutshwe ukwenza izethulo nezincomo zakhe ngalolu daba lapho eveze khona ukuthi ukhulume namadoda amathathu amele izisulu esikhundleni sokuba akhulume nazo zonke.
Uthe okuxakayo wukuthi uMbhishobhi Mvubu usenabo abalandeli abahlala begcwele inkantolo beyomeseka, okuyizimkomba zokuthi kungenzeka basamethemba ukuthi uzozigcina izethembiso zakhe.
Ngodaba lwebhizinisi likambhishobhi athe unalo nezimoto ezingama-32, uthe nalapho usonhlalakahle akaphenyanga ukuze azise inkantolo ukuthi ngabe (leli bhizinisi) likhona yini noma cha. UMbhishobhi Mvubu uwavumile wonke amacala athweswe wona. Uboshwa nje, yingoba usungule uhlelo olubizwa ngeZuza 4 Life lapho abantu abayisihlanu bebeqoqa imali engaze ifinyelele ku-R2 500 kumuntu emunye, obekuzobahlomulisa u-R15 million bazisungulele amabhizinisi abo.
Kuthiwa kakwenzekanga lokho, abantu abathintekayo okubalwa nenhlangano ezibiza ngeSivuno samaDunge, bamfaka enkantolo.
Leli cala selihlehle izikhawu eziningi kwenzeka izinto ezixakile uma lizoqulwa. Sekuke kwagula abameli belimala engozini yemoto, abashushisi, osonhlalakahle baphathwe yiziyezi.
Kukho konke lokhu, ubethi uma ebuzwa umbhishobhi ngezinsolo zokuthi usebenzisa amakhathakhatha na, athi umsulwa, akaphalazi ngisho nangetiye lodwa leli - naye akazi ukuthi kwenzekani.
Kakwaziwa ukuthi iyozala nkomoni ngoLwesihlanu. Naphezu kokuba eseke walahlwa ngelinye icala lokukhwabanisa wanikwa isigwebo esilengisiwe kepha wagcina esephulile waphinde wanikwa esinye esilengisiwe kwamanye amacala aphathelene nalo leli.