Isililo kumuka ingane emhosheni
Ipheshulwe wumoya kusakhishwa ezinye endlini
WEHLULELIKE wukuzibamba zehla mi izinyembezi owesifazane wakwa-D eMlaza, eningizimu yeTheku ngesikhathi echaza ngokumuka kwengane ye- ntombazane enezinyanga ezingama-22 ngoLwesibili ngesikhathi kuhlasele izimvula ezinamandla zihambisana nesiphepho.
Kumanje kuduma amakhanda emalungeni omndeni ka-Okuhle Kweyama isidumbu sakhe esilobe izolo ngoLwesithathu si- ngakatholakali. UNkz Mabuyi Dladla - oziphilisa ngokugada izingane eziyisi-6 zomakhelwane athole imali yokondla umndeni wakhe - uthi uzame ngakho konke okusemandleni ukuhlenga impilo yezingane azigadayo kodwa kwahluleka khona njengoba kugcine kumuke u-Okuhle. Uthi ngesikhathi liyidliva ngoLwesibili, kungene amanzi endlini agadela kuyona izingane, kwaphoqeleka ukuba azame ukuzikhiphela ngaphandle kungaze kwenzeke umonakalo. “Bengingedwa ngesikhathi ngizama ukuzisiza lezi zingane kanti kuzoqhamuka umfana wakwamakhelwane ngamcela ukuba angisize sizikhiphele
ngaphandle,” kuchaza uNkz Dladla. Uthi baqale bakhipha u-Okuhle nenye ingane, bababeka ngaphandle komnyango eduze nomgwaqo. Uthi umfana wakwamakhelwane ubuyele ngaphakathi endlini eyokhipha ezinye izingane ebezisele.
“Ubuye endlini u-Okuhle engasekho la abembeke khona esepheshulwe wumoya wayophoseka emhosheni oseduze nendlu, obusugcwele amanzi ngendlela exakile,” kusho yena. UNkz Dladla uthi obekwenzeka ngesikhathi lina, bekungathi kudlala ifilimu njengoba nomfana obemsiza ecishe wamuka ebambe izingane, wasizwa wukubambelela etsheni sakwazi ukumbamba simkhiphe.
Ngesikhathi ILANGA livakashele kubo ka-Okuhle laxoxa noNkz Lindo Kweyama (27) ongunina, bekunzima ngisho ukuba akhulume ngento eyehlele indodakazi yakhe. Uthi ingane yakhe ibingakaqedi ngisho inyanga eyodwa igadwa nguNkz Dladla.
"Ngiyilande emakhaya eMfume kade igadwa ngudadewethu ngenxa yokuthi ibigula njalo, ngagcina ngiphazamiseka nasemsebenzini ngifonelwa kuthiwa iyagula.
"Ibikade ihleli kahle kudadewethu,” kusho uNkz Kweyama. Uthi uthole ucingo esemsebenzini lumazisa ngomonakalo. “Ngizamile ukufonela u-anti ogada izingane ngesikhathi ngibona imvula ina ngifuna ukumbuza ukuthi kawangenanga yini amanzi endlini yakhe, ucingo wangaluphendula kanti kusho ukuthi bese kwenzeke umonakalo.
"Ngize ngathola ucingo selungitshela ukuthi mangiphuthume endlini yakhe sekwenzeke umonakalo,” kusho yena.
Imeya yeTheku, uNkk Zandile Gumede, ihambele kulo muzi okwenzeke khona umonakalo iyoqinisa umndeni idolo.