AMAKRISTU AWAVIKELE INKOLO YAWO NGOBUNYE
NGOKUKALUKA 23:17-23
NAMUHLA ngithanda sikhulume ngamandla adalwa wubunye kunoma yini eyenziwayo empilweni.
Kule ncwadi esifunda kuyona sivezelwa amandla obunye obasebenzela abantu ababememeza ngazwilinye, befuna ukuba uJesu abethelwe esiphambanweni bese kukhululwa uBaraba isiboshwa esasiyingozi, esasiboshelwe isiphithiphithi nokubulala.
Esikufundayo lapha wukuthi amandla obunye asebenza noma sekwenziwa into engalungile futhi iphumelele uma abayenzayo beyenza ngokubambisana nangezwi elilodwa. Sifundiswa ngabantu ababememeza ngazwilinye bebhekise kuPilatu befuna uJesu ukuba abethelwe esiphambanweni.
IBhayibheli lithi ukumemeza kwabo ngezwi elilodwa yikhona okwenza kuphumelele ababefuna ukuba kwenzeke. Bekufanele ukuba sithole isifundo esikhulu maqondana nobunye obaphumelelisa laba ababememeza.
Isikhathi esikusona sikhomba ukuthi ibandla likaNkulunkulu lisenkingeni yokuzingelwa, engaholela ekubeni ligcine lithulisiwe du maqondana nenkolo yalo yobuKristu ngokwezinto eziningi ezenzeka kulo mkhakha wenkolo.
Yiqiniso ukuthi zikhona izinto ezenzekayo, phakathi kwazo okunezingamukeleki kahle egameni lenkolo yobuKristu, zenziwa ngabathile futhi ezidicilela phansi isithunzi sale nkolo. Nakuba kunjalo kodwa kakusibona bonke abathinteka ekwenzeni lezo zinto ezimbi nezingamukeleki egameni lokukholwa kwethu.
Empeleni baningi kakhulu labo abenza kahle kunalabo abenza kabi. Ngenxa yalokho, kakufanele ukuba nalabo abamsulwa babalelwe ezonweni zabanye.
Lesi sekuyisikhathi sokuba ibandla likaNkulunkulu lihlanganyele ngezwi elilodwa libhekane nalokho okulwa nalo egameni lenkolo yobuKristu.
Ngamanye amazwi kufanele ibandla libemunye egameni lenkolo yalo yobuKristu, kungesikhona emagameni amabandla ngokwehlukahlukana kwawo.
Kunezinto ibandla likaNkulunkulu elingeke lakwazi nhlobo ukuzinqoba uma lingabumbene, likhulume lizwi linye egameni lenkolo yalo.
Lokhu kunomthelela omkhulu ekwehlulweni kwalo uma lingeke limemeze ngazwilinye egameni lenkolo yalo ukuze lizwakale kukhona konke elikukhulumayo emhlabeni.
Kulihlazo elikhulu ukubona ibandla lize lilanyulwe ngabantu bangaphandle kwenkolo yalo yobuKristu, kuze kungenelele nabantu abangazi lutho maqondana nenkolo yobuKristu, kugcine sekuyibona abalamula izimpi zamaKristu bona abangekho kuyona.
Ibandla kulesi simo elikusona, liyosizwa yinto eyodwa: wukuba lihlanganise iphimbo elilodwa likhulume lokho elifisa ukuba kwenzeke, likhulume ngalokho elingavumelani nakho ukuba kwenzeke egameni lenkolo yalo yobuKristu.
Yinye nje vo into eyokwenza ibandla likaNkulunkulu lizwakale ekukhulumeni kwalo: wukuba lihlanganise amaphimbo akubantu abaningi abeyiphimbo elilodwa, okuyikhona okuzolenza linqobe ekumemezeni kwalo.
Ziningi izinto ezingenzeki ziphumelele egameni lenkolo yobuKristu ngenxa yokuthi livumela isitha ukuba sisebenzise ukwahlukana phakathi kwamaKristu ukuze zonke izinto ezenziwa egameni lale nkolo kube nzima ukuziphumelelisa.
Ukumemeza kwababefuna kubethelwe uJesu yikhona okwabasebenzela bezwakala kwase kwenziwa lokho ababekufuna. Ngihlushwa kakhulu wukuthi amandla obunye asebenza nasezintweni ezimbi noma ezingafanele ukuba zenzeke.
Kunezinto eziningi ezingamukelekile ukuba zenzeke emhlabeni esiphila kuwona kodwa ngenxa nje yokuthi abantu bayanqoba entweni abayifunayo nakuba kuyinto okungafanele ukuba yenzeke. Kunezinto eziningi eziphambene nenkolo yobuKristu neziphambene nentando kaNkulunkulu ezenziwa ngabantu emhlabeni.
Uma amaKristu engakukhuthaleli ukuba akhulume ngazwi linye ukumelana nazo lezi zinto, zizoqhubeka zenzeke nakuba ziphambene nentando kaNkulunkulu ngoba kulezi zinsuku iphimbo elilalelwayo ngelabantu abaningi abakhuluma ngazwi linye futhi bebaningi kunabanye.
Sikhuthaza ukuba amaKristu abumbane ngazwi linye ukumela- na nezinto ezimelana nebandla nentando kaNkulunkulu ukuze kube wukunqoba kwalo ngobunye balo. Ibandla elingenabo ubunye libangela ukuba abantu bangaphandle bazicanasele kulona nakuba bengaphandle kodwa babe namandla okulidwengula balihlakaze liphele nya.
Ibandla kuyalisiza ukuba libemunye noma selihlaselwe yizinkinga ngoba ubunye balo benza lingahlakazwa kalula yizimpi elinazo. Baningi osomathuba abacuthela izikhathi lapho ibandla linezinkinga kodwa okuthi uma limunye kungabilula ukungenisa kulona ngezinkinga ezilikhungethe.
Kule ngosi yanamuhla ngikhuthaza ubunye enkolweni yobuKristu ukuze amaKristu abe namandla okuvikela inkolo yawo nakuba inezinkinga ezisegameni labathile bayo.