Sizenza thina inhlekisa kwezinye izizwe
UKUQOKWA kwegoli likanozinti weBaroka FC, u-Oscarine Masuluke ukuba libe kwamathathu okuzokhishwa kuwona elidle umhlanganiso emhlabeni jikelele, kuceba abathandi bakanobhutshuzwayo nezakhamizi nje zaseNingizimu Afrika.
Leli goli lo nozinti alishaye ngemizuzu yokugcina ezakhe zibamba i-Orlando Pirates kuba wu-1-1 koweAbsa Premiership ngesizini edlule, libangisana nelikaOlivier Giroud waseFrance ogijima kwi-Arsenal yaseEngland nelikaDeyna Castellanos waseVenezuela ogijima kwiSanta Clarita Blue Heat yase-United States of America (USA) kulo mklomelo obizwa ngeFifa Puskas Award.
Abantu baseNingizimu Afrika baqome ukuvotela igoli likaSphiwe Tshabalala ukuba lidle umhlanganiso - yize bekucacela nengane ukuthi elikaMasuluke lihamba lodwa ngobuhle. Into esiyibonayo wukuthi abantu abasuke bevota kabathathi ngobuhle nokubaluleka kwale nto abayivotelayo.
Lokhu kwenza sibuke ukuthi abadlali bamakilabhu anembijana yabalandeli ngeke balibone elidlalayo kwabagijima ezinkunzini ze-Absa Premiership ngoba phela zona zinezinkumbi zabalandeli - okucacayo ukuthi zivota ngokobuqembu hhayi ngokwemisebenzi yomdlali. Empeleni imikhakha efuze lo wegoli lonyaka sibona kungafanele uvotelwe wuquqaba, udinga amajaji kanobhutshuzwayo.
Le nto yenzekile nakumbhukudi waKwaZulu-Natal, uChad le Clos, okuthe egile izimanga eqoqa izindondo kodwa wehlulwa ngu-Itumeleng Khune weKaizer Chiefs, okhale wemuka nomklomelo wokuba ngumdlali wonyaka wezi-2013 eNingizimu Afrika. Siyavuma, uKhune ungumdlali oseqophelweni eliphezulu noLe Clos ngokunjalo, kodwa umehluko wukuthi lo mbhukudi ubenze kahle kunalo nozinti weziMpofana ngalowo nyaka.
Lokhu kwenze sabona sengathi uKhune uvotelwe yinqwaba yabalandeli beChiefs, abangazi nokuthi kukhona umuntu onguLe Clos. Leli goli likaTshabalala elehlule elikaMasuluke kwiPremier Soccer League (PSL), beliqokiwe nalo ukuba lizame ukubuya nePuskas kodwa kalifikanga ndawo. Lokhu kwenza abantu baseNingizimu Afrika babukeke sengathi kabazicubunguli izinqumo ngaphambi kokuba bazithathe. Empeleni igoli likaMasuluke bekungafanele ngisho nokuthi kube khona elincintisana nalo kwi-PSL kwazise lishaywe ngunozinti, esiza ikilabhu yakhe ukuba ithole iphuzu ngemizuzu yokugcina! Lo nozinti wenze into ebisiyehlule abagadli imizuzu eyevile kwengama-85. Le nto eyenziwe ngabathandi bakanobhutshuzwayo ifana ncimishi nevame kwipolitiki lapho uthola abantu bevotela isigebengu ukuba sibahole - yize besazi - ngoba nje bethi bavotela iqembu labo, hhayi sona.
Labo bantu kuthi kungakapheli ngisho inyanga kuvele obala ukungahlaziyi kwabo izinto ngaphambi kokuthatha izinqumo. Ubona ngabo sebemasha beshisa amathayi, bevimba izimoto zabantu abebengekho ngesikhathi bevotela isigebengu. Sinxusa abantu bakithi ukuba bayigweme le nto esenza sibe yinhlekisa kwezinye izizwe yokuvele sivote nje ngoba sibona umbala wesikibha seqembu umuntu ovotelwayo asigqokile.
Ake sikubheke ukuthi umuntu esimvotelayo kwezepolitiki ufunde wagcinaphi, akakaze yini athinteke ezenzweni zenkohlako, uyabahlonipha yini abantu.
Uma singabhekisisa kuqala ukuthi kungani sivotela umuntu othile kwezepolitiki, lokho kungasisiza ekubeni izinto ezifuze le eyenzeke ngegoli likaMasuluke, igwemeke. Makavotelwe lo nozinti ukuze akhale emuke nePuskas okuzobe kungokokuqala iqukulwa eNingizimu Afrika uma eyitholile.
Ubona ngabo sebemasha beshisa amathayi bevimba...