ABESIFAZANE ENDULO BEBEYAZI INDAWO YABO
INDAWO yomuntu wesifazane kusukela emandulo kuze kube yimanje, iyahlonishwa kakhulu. Kangikubukeli phansi ukuthi kunabantu asebehlukumeza abesifazane, kodwa ngokwemvelo nangokwesikompilo lethu thina ma-Afrika, abesifazane bayahlonishwa kakhulu.
Ngokujwayelekile, esikhathini esiphambili abesifazane bebeyihlonipha indawo yabo yobufazane, bekungakhathalekile ukuthi uganile noma qha, inqobo nje uma esesigabeni esevuthiwe ubumbona ngesithunzi nokumela lokho akholelwa kukhona. Bengiqaphela ngesikhathi ngikhula ukuthi bekungelula nje ukuhlangana nomuntu wesifazane akubukele wenza into engafanele, bekuyaye kube nendlela azokuxwayisa ngayo kuleso senzo, engenandaba noma uyakwazi noma akakwazi yini. Kangisazi kahle manje kulesi sikhathi ukuthi yini lena eshintshile ngathi besifazane esithanda ukubeka isithunzi sethu engcupheni.
Bekujwayeleke ukuthi uma ubaba wekhaya esedlulile emhlabeni, uthole ukuthi ikhaya limile, livuthiwe, lihloniphekile futhi linesizotha linanemfudumalo ekhombisa ukuthi ukhona umama ulengamele. Ngokuqonda kwami, lokhu bekwenziwa wukuthi umama ubesilwela isithunzi sakhe, elesaba ihlazo, engafuni izwe limbone njengesahluleki osekuthe ngokuhamba kukababa wekhaya wadedela izingane zaphendula ikhaya laba yikwampunzi edl’ emini. Bekuze kube nokuqhathaniswa kwemizi engasenabo obaba nengasenabo omama, kuthiwe lo ongasenababa unesithunzi kunongasenamama - ngokujwayelekile.
Namanje kweminye imizi kusenjalo kodwa kunendawana ethanda ukungikhathaza ngabanye besifazane othola ukuthi indlela asebenza ngayo izinto, ithanda ukulumela, yenze kube sengathi kasisayihloniphi indawo yethu. Ngokwemisebenzi esiyenzayo nangamazinga ethu emfundo, uthola ukuthi emsebenzini nasemphakathini sesinezikhundla ezisenza sishaye imithetho futhi siphathe, kodwa kangiboni lokho kusinika amalungelo okuthi emindenini yethu singabe sisazithoba sihlale endaweni yethu yesizotha sobumama. Uthola ukuthi emindenini sesikhombisa ukuthi kasincenge muntu, sesifuna kuzwiwe ngathi - abanabazali kabasafuni umzali alibeke.
Kangisho ukuthi abantu besifazane makudlalwe ngabo futhi bazenyeze, kodwa sizwakalisa ilaka lethu sibe sikwenza ngendlela eyakhayo, enenhlonipho, engeke igcine isisenza sibukeke njengabantu asebesukile endaweni yabo yobumama. Lokhu ngikushiswa wukuthi yithina imvamisa esiyisisekelo sokukhuliswa kwabantwana, manje uma besibona sesibanga umsindo, sikhipha okwakuthangi phambi kwabo, bayadideka bangasazi ukuthi bathembele kubani. Ngiyaye ngithi ekhaya noma emndenini kufana nasegunjini lokubelethela, lapho kungabuzwa khona ukuthi uneziqu ezingaki nokuthi ufunde kangakanani, uyazithoba wehlele ngezansi, ulalele abahlengikazi ngisho ngabe wena wazi ngaphezu kwabo - ukuze usindise impilo yomntwana.
Nasemindenini kumele singene nalowo mqondo singomama ukuze kube nokuthula ngoba uma siphakama sonke, ngeke siyakhe le mizi nalaba bantwana ngeke sibakhulise ngendlela elindelekile. Kakukuhle ukuba umama ohlonishwayo emphakathini nasemsebenzini kodwa ekhaya bebe bengathokozile ngaye ngenxa yempakamo asenayo nokuzazi. Indawo yethu singomama - kungaba ngokwenkolo noma ngokwesiko - ngeyokuthobeka, ukuzehlisa, ukulalela, ukudala ukuthula nokukhuluma okwakhayo hhayi ukuqagulisana.
Okunye okuyisifundo engasithola kugogo owangikhulisa, wukuthi uma usuganile bese kuba nokungaboni ngasolinye nomyeni wakho, ungabojwayela njengomama ukusheshe uyomceba lapho uzalwa khona, okungenani zama ukuthola izeluleko kubantu abaseceleni abangahlobene kakhulu nawe nomyeni wakho noma ubike kubo komyeni uma ubudlelwano benu buhamba kahle. Uthi ugogo ingozi yokubika kini wukuthi abakini kakulula ukuba bamxolele umyeni wakho, yize wena usumxolele. Isifundo engasithola kule mfundiso kagogo wukuthi umendo wakho udinga wena uqobo lwakho ngoba wena uwazi kangcono kunabo bonke abantu abangaphandle kwawo.
Kungenzeka izeluleko zabo zingakusizi ukuba ugcine umendo wakho, hlala endaweni yakho yobumama ufunde ukubhekana nezimo zakwakho ungaze uyodalula ubuthakathaka bomendo wenu. Ngingezwakali kabi, kangisho ukuthi hlala emendweni uxakekile ungakhali, cha khuluma endaweni efanele nangesikhathi esifanele, ungakhulumi usathukuthele ngoba uzosho nezinto obungaqondile ukuzisho, kanti ukuba uzibambile wahlaziya isimo nokuthi uzoxoxela bani, ubuzozizwa selehla ilukuluku ukwazi nokucabanga kahle.
Siyazidinga izigcawu esizobuthana kuzona, sihlale phansi sikhumbuzane ukuthi kuyini ukuba ngowesifazane, iyini indima okumele siyikhathule futhi sihamba sigcine kuphi mhlawumbe ngokwenkolo nangokwesiko futhi sihlala kanjani endaweni esidalelwe yona nenkululeko yezwe nezikhundla zemisebenzi sizehlukanisa kanjani nokwasekhaya nasemindenini. Kakonakele mbokodo yase-Afrika, masiyibeke etafuleni siyidingide, izolunga! Makhosi Ndleleni (Bonakele) uMaZulu Zondo.Insika yaMathiyane. UThishanhloko waseMatatane Secondary School. mthiyanesgs@yahoo.com 082 752 7342