UMKHONZA UBAMBE KWESOKUQEQESHA
UDOCTOR Mkhonza ubanjiswe izintambo zokuqeqesha iNatal United ezovovana inkani neSummerfield Dynamos koweSouth African Football Association (Safa) KwaZulu-Natal ABC Motsepe League ngoMgqibelo ngo-15h00 eMzisho Stadium, eMsinga.
ILANGA lithole ukuthi uMkhonza uzobe elekelelwa nguSipho Zimba okuthiwa uzobhekana nokucija onozinti bale kilabhu kaSenzo Sokhela.
ILANGA lithole ukuthi umqeqeshi ogaqelwe yile kilabhu wenza umsebenzi ofanayo kwenye ikilabhu.
Kuthiwa kunzima ukuthi iNatal imthole ngenxa yesivumelwano anaso naleyo kilabhu.
Ethintwa uthe uMkhonza bamlandele ubuhlakani anabo ebholeni.
Uthi abazukuxhamazela ukuqasha umqeqeshi.
“Kuyiqiniso impela ukuthi kukhona umqeqeshi esimfunayo kodwa kusabambe izinkinga ezithile. Kuyasicacela ukuthi uma konke sekulungile sizokwazi ukubhubhisa. Kangijahile kakhulu ngendaba yokunyukela kwiNFD ngoba ngisahlanganisa ikilabhu y lami.
Kangifuni ukufakela abaqeqeshi ingcindezi engenaso isidingo. Uma ithuba livela ngeke siliyeke lokuyodlala imidlalo yokuhlungela ukungena kwiNFD ngesizini ezayo,” kusho uSokhela.
Isiyonke imidlalo yeSafa KZN ABC Motsepe League engempelasonto ihlelwe kanje: NGOLWESIHLANU EMhlathuze Sports Complex: Milford FC vs Drakensburgh FC 18h00. NGOMGQIBELO Ugu Sports Complex: Happy Wanderers vs uMvoti FC 12h00.
EMzisho: Natal United vs Summerfield Dynamos 15h00.
EKing Zwelithini: Durban FC vs Ses’khona FC 15h00.
EKandahar: Ladysmith United vs Edendale Juventus 15h00.
EStanger High: KwaDukuza FC vs Ashley United 15h00.
EWorkington: GWP Friends vs KwaMashu All Stars 12h00.