Kumoshwe imali ngezakhiwo zaseMzumbe
SIBABAZA isimanga sokuxhashazwa kwemali ngezakhiwo ezingaphansi kukaMasipala uGu nenkonyane lawo eliwuMasipala waseMzumbe. NgoLwesine olwedlule ILANGA libike mayelana nobhazabhaza bezakhiwo ezinye zazo eseziphenduke izikhowe zezinyoka, okungadingi nokuba uze utshelwe ukuthi zakhiwe ngezigidi zamarandi kodwa kazisebenzi.
Kukhona nenkundla yokudlala ibhola lomphebezo okuvela ukuthi yagcina ngokugxunyekwa nje, kakukaze kubonakale ngisho nezingane zizama ukudlala. Okudabukisayo-ke wukuthi omunye ukhomba omunye esweni omunye uvikel’ iso lakhe kubaholi bakamasipala nalabo abebephethe phambilini.
Omunye uthi abakhe lezi zakhiwo bazithatha bayozithi dlwa endaweni okungelula ukuba abantu bafinyelele kuyona, omunye uthi esinye kasakhiwanga wumasipala, ngesikahulumeni omkhulu.
Le mpikiswano ngeke isize ngalutho ukubuyisa le mali engaka emoshiwe abantu bebhuqwa yindlala. Kungani abaholi bazicabangele bona bodwa, bakhohlwe wukuthi imali le abayibhubhudla ngokwenza yonke le nto abayenzayo, isetshenzelwa kanzima ngabakhokhi bentela?
Kuye kufike nje emiqondweni yabo ukuthi kunabazali abafisa izingane zabo zifunde ezikoleni zezinga eliphezulu kodwa kabakwazi ukukwenza lokho, kunabantu abalala obenyoni emijondolo - njengoba nesimo sezulu sesithanda ukuba nolaka - kukhona abalala bengakaze bakuthi mbibi okuya ngasethunjini? Sikhuluma nje kunabafundi abafisa ukuqhubeka nezifundo zabo ezikhungweni zemfundo ephakeme kodwa kabakwazi ngenxa yokungabi nenkece - le emoshwayo kwakhiwa iziduli ezingalali muhlwa. Sifisa ukuba uhulumeni ungenelele kulolu daba.
Siyayizwa eyeMeya yaseMzumbe, uMnu Sizwe Ngcobo, ethi kukhona imizamo abaphezu kwayo ukuze ekugcineni ezinye zalezi zakhiwo zisetshenziswe, umbuzo uthi bekulindweni sonke lesi sikhathi ngoba ezinye zalezi zakhiwo zineminyaka engaphezu kweli-10 zikhona. Kunendaba evelayo yomnikazi wendawo okwakhiwe kuyona esinye salezi zakhiwo okubikwa ukuthi ufuna u-R10 million ngayo ngoba kakukhulunywanga naye ngesikhathi sakhiwa.
Cha, uma singabhixwa ngobhuku emehlweni, kuyosho ukuthi ubuholi obakhe leso sakhiwo busadinga uhlunguhlungu buthi ukubhenyiswa bese busanguluka. Kasikholwa ukuthi kungasuka isakhiwo sikahulumeni endaweni yomuntu izindonga zime nje impela, kuze kufulelwe kodwa yena engazi.
Impela siyehluleka wukukukholwa lokho - phela uma kuliqiniso lokho, kuyosho ukuthi ubuholi bukahulumeni obakhe leso sakhiwo, bungamasela, buntshontshe imali yabakhokhi bentela nendawo yomuntu. Sicela ukuba kusheshiswe kutholwe indlela lezi zakhiwo ezizosetshenziswa ngayo, kuvele nabantu abayimbangela yokuthi ziphenduke le nto eseziyiyona bathathelwe izinyathelo.
Kulezi zakhiwo kukhona okuthiwa besizoba yiTusong Centre - lapho okuye kutholakale khona amahhovisi kahulumeni ahlinzeka umphakathi ngezidingo eziningi ezahlukene - bangaki nje abantu abebezosikazala lapho? Bangaki abantu abebezothola imisebenzi kulezi zakhiwo? Lezi zinto zizoqhubeka nokudweba isithombe esibi ngabaholi abampisholo, ezinye izizwe zithi kabakwazi ukuphatha. Sibona impela kunenkinga yokuphatha uma kuwukuthi abaholi bavumela ukuba imali yabakhokhi bentela ixhashazwe ngale ndlela. Sicela iphele eyokukhombana ngeminwe, makulungiswe le nkinga izakhiwo zisebenze, abantu baseMzumbe basizakale.
Kungani abaholi bezicabangela bona bodwa