UKHOZA UGXEKA IZIDAKWA EBHOLENI
UKHWELE wadilika kubadlali abangokhanda limtshela okwakhe u-Irvin Khoza onguSihlalo wePremier Soccer League (PSL). UKhoza ubehola ithimba lePSL ebelivakashele uCedric “Sugar Ray” Xulu emzini wakhe ngoMgqibelo emini eClermont ngaphandle kancane kwasePinetown.
UKhoza uthe kunohlelo olukhulu abazolwethula okuhloswe ngalo ukukhuthaza abadlali ngendlela efanele yokuziphatha. Uthi ukulahleka kwesimilo emiphakathini yakuleli yikhona kanye okudala ukuthi abadlali balahlekelwe yisimilo nenhlonipho.
“Thina sikhule ingane ithethiswa futhi ishaywa ekhaya. Bekuthi nxa yenze iphutha ithethiswe umakhelwane obekwenza ibone ubumqoka bokuziphatha kahle emphakathini. Nasesikoleni bekuyinto efanayo ngoba nothisha bebeba ngabazali. Namuhla uma ufaka ingane endleleni kuthiwa kumele uthwese icala lokuyihlukumeza. Laba badlali abagijima kwiPremier Soccer League (PSL) babuya kuyona lemiphakathi esilahlekelwe yisimilo. Lokhu kwenza ube mkhulu kakhulu umsebenzi esibhekene nawo njengabaphathi bama kilabhu. Sekukaningi silahlekelwa ngabadlali ezingozini zomgwaqo okuthi nxa kuphenywa kuvele ukuthi bebephuma ezindaweni zokujuxuza. Kuwumsebenzi wethu sonke ukunqanda lo mkhuba. Amakilabhu ngeke enze lutho ewodwa ngakho-ke kumqoka ukuthi nomphakathi ubuyelwe yisimilo. Abadlali bamanje kungaba kuhle babukele kubantu abafana noXulu. Sekukudala aliyeka ibhola kodwa usaphila impilo ehlanzekile ngenxa yokukwazi ukuzihlonipha,” kusho uKhoza.
Ubephelezelwa nguMato Madlala oyisikhulu esiphezulu esibambile kwiPSL, uPatrick Sokhela onguSihlalo wamaZulu FC, uSbu Mpisane ophethe iRoyal Eagles noVuma Mfeka ongumngani omkhulu kaXulu. UXulu ubonge kakhulu uKhoza nethimba lePSL ngokumkhumbula njengoba impilo yakhe isibuthakathaka.
UWillies Mchunu onguNdunankulu waKwaZulu-Natal ungomunye wabantu abahlale belitusa iqhaza elibanjwe nguXulu kunobhutshuzwayo waseNingizimu Afrika. UMchunu njalo ngoZibandlela (December) unikeza izingwazi izipho ezahlukene.