ILANGA neBerea Tech banikezela ngemifundaze
Lokhu kuyindlela yokwelekelela ekwakhiweni kwesizwe
UKUKHATHALELA imfundo yabantwana - ikakhulukazi abampisholo - kweLANGA neBerea Technical College, kuholele ekubeni lezi zakhiwo zakhe ubudlelwano obuzohlomulisa intsha ezimisele ngokuqhubeka nezifundo zayo.
Izolo ngoLwesithathu, ILANGA neBerea Tech, bethule ngokusemthethweni umfundaze ozosiza abafundi abali-10 abazoba nenhlanhla yokutonyulwa emncintiswaneni ozoqala ngoMsombuluko. Umfundi ngamunye kwabali-10 abazodla umhlanganiso, angathola umfundaze ongafinyelela ku-R40 000, kuye ngomkhakha awufundelayo.
Phakathi kwabebehambele lo mcimbi kwabeLANGA, uMnu Arthur Konigkramer ongumqondisi omkhulu, uMnu Andrew Taylor oyimenenja yezokumakethwa kwephephandaba, uMnu Vishal Nunkumar oyimenenja-jikelele , uNkz Nolwazi Mbutho osehhovisi lezokumaketha, uMnu Sazi Kasipho Majola oyibamba lomhleli omkhulu. I-Berea Tech imimelwe nguMnu Sbongiseni Magwaza oyisikhulu esiphezulu kuelsi sikhungo semfundo.
UMnu Magwaza uthi lesi sikhungo sibalwa neziphambili eNingizimu Afrika kanti sesikhiqize inqwaba yabafundi asebephumelele ezifundweni nasempilweni yabo.
Uthi uyethemba ukuthi lobu budlelwano phakathi kwalesi sikhu- ngo nephephandaba ILANGA busazoqhubeka futhi bukhule ukuze nabanye abafundi bezothola ithuba.
“Lapha eBerea Tech sinabafu-ndi ababalelwa ezinkulu-ngwaneni futhi sinezifundo eziningi abafundi abangazi-khethela kuzona.
“Njengoba sesinobudlelwano neLANGA, siyethemba ukuthi abafundi ikakhulukazi abenza umatikuletsheni bazolithatha ngezandla zombili leli thuba ukuze bezokwenza impilo yabo ibe ngcono.
"Kangingabazi ukuthi lokho kuzokwenzeka ngoba sinenqwaba yabafundi esesibakhiqizile kulesi sikhungo, okuyimanje bayasebenza abanye baphumelele empi- lweni. Sibonga kakhulu kuleli phephandaba ukuba sibambisane nalo kulokhu," kusho uMnu Magwaza
UMnu Konigkramer uthi nakanjani lobu budlelwano buzolekelela intsha kakhulu.
“Uma sifuna ukuqeda izinga lokungatholakali kwemisebenzi kuleli, imfundo yiwona khiye wokuvula lowo mnyango. Izinga lokungasebenzi kwentsha liphezulu kakhulu, ngakho-ke siyajabula ngalobu budlelwano.
“Siyethemba ukuthi buzoqhubeka futhi bukhule buye phambili kusizakale nentsha,” kusho yena.
UNkz Kwanele Kunene ongomunye wabafundi asebephumelele, abaqale ukufunda kulesi sikhungo. Uthi namanje akakholwa yibanga aselihambile empilweni yakhe njengoba esebuya naseEurope. Uthi ukuba bekungelona usizo lweBerea Technical College, akaboni ukuthi ngabe usehambe ibanga elingaka.
“Ngisafunda benginesifiso sokuba ngudokotela kodwa ngenxa yokuthi izifundo zami kangiziphasanga ngaleli zinga ebelifuneka esi- khungweni sobudokotela, ngiphoqelekile ukuba ngiye eBerea Tech ngiyokwenza izifundo zeChemical Engineering.
“Ngibe sengiya eDurban University of Technology (DUT) nakhona ngathola iziqu zeAnalytical Chemistry. Ngisebenze okwesikhashana eTongaat Hulett ngenza i-in-sevice training khona. Kangigcinanga lapho kodwa ngibuyele eDUT ngiyokwenza i-B.Tech.
“Ngonyaka ophelile ngithole umfundaze wokuyofunda phesheya eLatvia khona ngifunde kusukela ngoMandulo (September) wezi-2016 ngaqeda ngo-Ntulikazi (July) wezi-2017. Kumanje ngimatasa ngenza iMasters kwiChemistry,” kusho uNkz Kunene.
Uthi ubonga kakhulu kwabaseBerea Tech njengoba eqale khona imfundo yakhe ephakeme.
Uma sifuna ukuqeda izinga lokungatholakali kwemisebenzi kuleli, imfundo yiwona khiye wokuvula lowo mnyango. Izinga lokungasebenzi kwentsha...