Ubophise uyise ngamanga
Baphoqiwe ukuba bathi ubadlwengulile
UGEQE amagula, wahlanza amaqiniso owesifazane waseSikhaleni, eMpangeni, enyakathompumalanga yeKwaZulu-Natal obophise uyise - okumanje udonsa udilikajele ejele laseQalakabusha, eMpangeni - ehlangene nodadewabo omncane bemqambela amanga ngokuthi ubadlwengulile.
Ukhuluma aze ahlengezele izinyembezi uNkz Sphiwe Ndu Sithole (20), uma echaza ukuthi kungani beqambele uyise amanga bathi ubadlwengulile. ILANGA libe nengxoxo ekhethekile noNkz Sithole osebuyele kubo wayocela uxolo ngemuva kokubaleka isikhathi eside wayohlala ekhaya lezintandane.
ILANGA libike kaningana ngokuboshwa kukaMnu Mandlenkosi Sithole (55) - okhalelwe ngamasongo kaSigonyela ngowezi-2012 - ogwetshwe ngoMbasa (March) odonsa isigwebo sokudilikelwa yijele eQalakabusha eMpangeni. UNkz Sithole utshele leli phephandaba ukuthi bavumele ukusetshenziswa ngamalunga omphakathi abengamfuni uyise emphakathini ngoba edinwa wukuthi ulwa nobugebengu endaweni.
Uthi uyise ubeyindoda eqotho emphakathini eyilunga leCommunity Policing Forum (CPF) - ngaphambi kokuba aboshwe. Uthi indaba iqale ngokuba omakhelwane babatshele ukuthi uMnu Sithole nenkosikazi yakhe kakubona abazali babo. “Abantu bebehlale besifunza ukuthi kasizalwa kwaSithole, umama osizalayo wasilahla sisebancane kwaSithole.
"Le nto ibisihlukumeza emqondweni nodadewethu omncane, sinemibuzo eminingi, sifuna ukwazi ukuthi baphi abazali bethu bangempela. Sigcine ngokuba siphazamiseke emqondweni, sahlukumezeka kakhulu nasesikoleni, saqala saba wuhlupho singalawuleki umama nobaba uma besikhuza singabalaleli.
"Kuze kwagcina ngokuba abantu abebengamfuni ubaba basifunze ukuba simqambele amanga sithi uyasihlukumeza ngokusidlwengula ngoba engasizali basithembisa ukuthi bazositholela ikhaya elingcono lezintandane lapho esizohlala kahle khona,” kusho uNkz Sithole.
Uthi bagcine belakhile icebo lokuqamba amanga.
Utshele ILANGA ukuthi udadewabo untshontshe imali yasesitolo sikayise (uMnu Sithole) kwaba wukubaleka kwakhe kubo ngoba esaba ukuthi uyise uzomshaya. Ube eseqamba amanga wathi uyise umdlwengulile, wahamba wayobikela usonhlalakahle.
Uthi udadewabo - okumanje uhlala ekhaya lezintandane - selokhu bakhe leli tulo, kabasaxhumani, usezame kaningi ukuba babonane kodwa lutho. Uthi usonhlalakahle obephethe udaba lwakhe, umphoqile ukuba asenge ezimithiyo athi udlwengulwe nguMnu Sithole.
Uthi lo sonhlalakahle umtshele ukuthi umphoqa ukuhubhuza ilumbo nje, uyalelwe ngamaphoyisa abephethe icala labo ngoba efuna uyise abhadle ejele. “Iphoyisa ebeliphethe icala lokudlwengulwa kwethu, belihlangene namalunga omphakathi abengamfuni ubaba. Kwakhiwe uzungu lokumbophisa ngoba eyinkinga emphakathini. “Sikwenze lokhu nje, bese siqalile ukuba wuhlupho ekhaya, sihamba nabafana sibuye ebusuku. Ngize ngadlwengulwa emgwaqweni ngakho ukuzula sibuya ebusuku.
"Ngilivulile icala lokudlwengulwa, udaba lwami lwafika nakosonhlalakahle. Ngiyazisola ngokubophisa ubaba owasicosha silahlwe ngumama osizalayo wasikhulisa. Kangilali ebusuku ngicabanga ngento esiyenzile. Ngiyafisa osonhlalakahle bangihlanganise nengane yakithi ngoba ngiyazi lapho ikhona iyafisa ukukhuluma iqiniso ngento esiyenzile," kusho uNkz Sithole.
Njengamanje uNkz Sithole usene-zingane ezimbili azithole ngemuva kokubaleka kwaSithole. Ubuyela kwaSithole nje, ubekipite noyise wezingane zakhe. UMnu Sithole usidlulisele eNkantolo eNkulu yaseMgungundlovu isigwebo sakhe. Okhulumela uMnyango wezokuThuthukiswa koMphakathi KwaZulu-Natal, uMnu Vukani Mbhele, uthi kuyamangalisa ukuthi usonhlalakahle angenza into efana nalena. Uthi bazolinda umthetho wenze umsebenzi wawo njengoba udaba lusenkantolo.
UMnu Derrick Mdluli, ongusihlalo weJustice for Prisoners and Detainees Trust, okuyinhlangano elwela amalungelo eziboshwa, uthembise ukuthi uzoxhumana nomndeni wakwaSithole ukuze angenelele kulolu daba bazame ukusiza uMnu Sithole. Imizamo yokuthola uMnu Mthunzi Mhaga okhulumela uMnyango wezoBulungiswa iphunzile, ucingo lwakhe belukhala lungabanjwa, ushiyelwe umyalezo, kuze kwashaya isikhathi sokuloba engaphendulanga.