BADINIWE NGAMAMITHA OKUPAKA KWADUKUZA
UYAVUTHA umphakathi owakhele idolobha iKwaDukuza, ogwini olusenyatho yeKwaZulu-Natal, ngohlelo lwamamitha okupaka agxunyekiwe njengoba bethi amba eqolo futhi kawaziswanga ngawo.
Abakhala kakhulu ngabashayeli bezimoto abasebenza bahwebe kuleli dolobha. Nakuba uMasipala waKwaDukuza uthi lolu hlelo, olwethulwe ngoMsombuluko ezimpambanweni zomgwaqo uChief Albert Luthuli noKing Shaka - njengoba uMfumfu (October) kuyinyanga yezokuthutha - luzoshintsha impilo yabantu abaningi, lwehlise ubugebengu, lwandise amathuba emisebenzi kodwa abezimoto bashaya amakhala.
La mamitha - aqhamuke nomasipala neVusa Isipho & Trading Enterprise - azoqala ukusebenza mhla ulunye kuLwezi (November) nonyaka.
Kulindeleke ukuba kuqashwe abantu abangama-60 uma seluqalile ukusebenza lolu hlelo lwamamitha kodwa abashayeli bathi kufana nokuthi umasipala uyabaqola njengoba uthi ukupaka ihora kuzoba wu-R6.
UMnu Bhekithemba Ngubo (37), ohlala eMellvile, osebenzela kuleli dolobha, uthi nakuba ushintsho ludingeka kodwa luzomba eqolo, sebezongena kwezinye izindleko yize nesimo somnotho sintengantenga.
“Sekuzoba nzima ngempela, mina bengingazi nokuthi sekuzokhokhwa, ngethuswe yibhodi nje elixwayisayo sengiya emotweni yami. Ngike ngaya emadolobheni ahlukene kodwa kakubizi kangaka. Sekuzomele ubhajethe manje,” kusho uMnu Ngubo.
Kuzothanda ukusinda kwehlela kubantu abaningi abanezimoto abasebenzela kuleli dolobha njengoba bengenazo izindawo zokupaka, bezishiya emigwaqweni izimoto zabo.
UNkk Nonhlanhla Gumede (47), osedayise iminyaka evile kweli-10 KwaDukuza, onemoto ehlala ipake emgwaqweni waleli dolobha, ukhala ngemali azoyikhipha njalo ngosuku.
Uthi ufika ngehora lesi-08h00 aze ahambe ngelesi-18h00 - uthi usezolimala kakhulu ephaketheni njengoba ezohlukana no-R60 wokupaka.
“Lokhu kuzosishaya kakhulu emalini. Nakuba bethi lolu hlelo luzoqeda ubugebengu, ludale amathuba emisebenzi kodwa bekumele umasipala ucabangele abantu abahwebayo.
“Kasenzi inzuzo eningi, kumele basizwele thina esidayisayo,” kusho uNkk Gumede.
Umasipala uthi lolu hlelo kumele lube khona naKwaDukuza njengoba amadolobha amaningi esenalo. Uthi usemkhankasweni wokuqhuba iphupho laleli dolobha elibizwa ngeVision 2030 ukuze lithuthuke lifane namanye amakhulu.
IMeya yaKwaDukuza, uMnu Ricardo Mthembu, ithe bebeyilindele imibono ezovela kubantu, kodwa okubalulekile wukuba khona koshintsho edolobheni ukuze kuvuleke namathuba emisebenzi.
“Abantu basazolujwayela lolu hlelo, ezindaweni eziningi selukhona,” kusho uMnu Mthembu.