UKHALA EZIMATHONSI OTHI UQOLWA NGUMMELI
UKHALA ezimathonsi owesilisa waseMlaza, eningizimu yeTheku, osesola ukuthi uqolwa izizumbulu zemali ngummeli wenkampani iD Soma & Co, akhokhe kuyena imali yendlu ayithenge ngowezi-2015.
UMnu Vuyani Majola (22) utshele ILANGA ukuthi uthenge indlu kwaF eMlaza kanti uzothola ngommeli, uNkk Soraya Essop, akhokhe kuyena imali - uma kushintshwa ubunikazi bendlu - ukuthi kunomuntu oyithenge ngokungemthetho komunye ummeli.
UMnu Majola utshele leli phephandaba ukuthi indlu uyikhokhele u-R293,325.32 okuyimali ayithole kwaRoad Accident Fund (RAF) emuva kokuba sengozini yemoto.
Uthi uzamile ukuvula icala esiteshini samaphoyisa eCommercial City naseWorkshop eThekwini kodwa wangakuthola ukusizakala, watshelwa ukuthi kumele udaba lwakhe alubike kwaLaw Society.
"Kungiphatha kabi ukuthi ngithenge indlu kodwa kangikaze ngingene kuyona. Ukuze ngize ngithole ukuthi indlu yami ithengiwe, kusize ukuba ngibuze ummeli (uNkk Essop) mayelana netayitela layo ngoba ngibona kuphela unyaka ngingalitholile. Ungitshele ukuthi kusaphenywa ukuthi indlu idayiswe kanjani okwesibili ngoba mina besengiyithengile.
"Ngethukile ngesikhathi ethi (ummeli) indlu yami idayiswe ngokungemthetho futhi kube nobugebengu ngesikhathi isidayiswa okwesibili. Okungicika kakhulu wukuthi sekuphele iminyaka emibili ngingenakhaya kodwa ngibe ngithenge indlu ngemali engaka.
"Ummeli ungitshele ukuthi ukuze ngikwazi ukuthola imali yami, kumele kuhoxiswe ukudayiswa kwendlu," kusho uMnu Majola.
UNkk Essop utshele ILANGA ukuthi uyalwazi udaba lukaMnu Majola futhi umatasa nalo. “Ukuze uMnu Majola athole imali yakhe kumele umuntu ongumnikazi wendlu obeyithengisa ahoxise ukuyidayisa.
“Ummeli othinteka kulo mkhwabaniso uzobhekana nengalo yomthetho njengoba ephenywa ngabeLaw Society kwazise akaqali ukwenza into efana nale. UMnu Majola kumele abekezele, udaba lwakhe luzolunga maduze nje,” kusho uNkk Essop.
UNkz Nelissa Gilenhuys wakwaLaw Society eMgungundlovu, ucele ukuthunyelelwa imibuzo, wathi uMnu Arnold Mahlobo, olubhekelele, akekho emsebenzini, uzoba khona ngoMsombuluko.
phumelela@ilanganews.co.za