Iyasidida eyomfuziselo kamengameli eNigeria
KUSHAYISA ngamakhala ukwenza komphathi wesifundazwe saseNigeria i-Imo, uMnu Rochas Okorocha, ogxumeke umgxusha womfuziselo kaMengameli Jacob Zuma, waqamba umgwaqo ngaye kuleliya lizwe elinenqwaba yabantu abadla imbuya ngothi - akagcinanga lapho njengoba emnike nesithunzi sokuba yinkosi.
Lo mfuziselo okubikwa ukuthi udle imali engalinganiselwa ku-R19 million, wenza sizibuze ukuthi yini le engaka ecubuze inhliziyo kaMnu Okorocha aze awugxumeke. Le mpunyela kasopolitiki waseNigeria izidonsele amanzi ngomsele njengoba abantu base-Imo ibanengile indaba yalo mfuziselo okuholele ekutheni ngoMsombuluko inhlabaluhide yezimoto zayo ijikijelwe ngamatshe yizakhamizi ebezinengekile.
Imibiko ithi abantu baseNigeria bayazibuza ukuthi kungani abaholi bakuleliya lizwe bengahlonishwa ngendlela okwenziwe ngayo kuMengameli Zuma.
Okusikhathazayo wukuthi kungani uMnu Okorocha equnge isibindi wakha lo mfuziselo yize umlando kaMengameli Zuma - selokhu ethathe lesi sikhundla - unamachashazi amaningi, okuba-lwa kuwona ukulandelwa ngamacala angama-783.
Iyadumaza indlela abaholi base-Afrika abenza ngayo izinto kwazise kabenqeni ukumosha imali bakha izinto ezingeke zibasize ngalutho abantu yize amazwe amaningi akuleli lizwekazi ebhuqwa yindlala.
Naye uMengameli Zuma uma kuwukuthi uyalwazi usizi olubhekene nabantu baseNigeria, sibona ukuthi bekungafanele ajabulele ukuthi kuxhashazwe imali abantu bebhuqwa yindlala. Sicabanga ukuthi ubengaba yiqhawe elinogazi cishe kubantu bonke base-Afrika - njengoba kuthiwa ujabule waze wathi uke wahamba emigwaqweni yaseNigeria elwela inkululeko kodwa namhlanje uhamba kuleliya lizwe njengeqhawe - ubezocela ukuba le nkence engaka isetshenziselwe ukusiza abantu abadla imbuya ngothi.
Empeleni nje, indaba yemifuziselo e-Afrika kasiyiboni ibalulekile kwazise amazwe amaningi ayahlupheka - makuqalwe ngezinto ezizosiza kakhulu abantu.
Kusizani ukuba nomfuziselo ongeke ubasuthise abantu, ongeke usize ekutheni kutholakale imali yokuba izingane ziye esikoleni, ongeke usindise iziguli, ongeke uholele amaphoyisa asebenza kanzima ehubhana nezigilamkhuba? Siyazi ukuthi imifuziselo iyingxenye yokuzama ukuthuthukisa ezokuvakasha nokugcina umlando, kusazi-ke ukuba kugcwale izivakashi ezizofika ezweni abantu bakhangeze becela onsumbulwana?
Zona-ke leso zivakashi zizobe seziwubonaphi lowo mfuziselo uma abantu bakulelo lizwe bengawufuni ngoba kuzohamba kuhambe bawuthele phansi ngenxa yokucasuka? Uma abantu base-Afrika bengaphaphami, lezi zinkinga ebezidalwa ngamazwe asentshonalanga - amanye awo asazidala namanje - sibona zizofana nohlamvu esihlabathini solwandle uma ziqhathaniswa nezidalwa ngabaholi bethu.
Le ndaba kaMengameli Zuma iphendule iNingi-zimu Afrika ihlaya ezinkundleni zokuxhumana.
Kunabantu bakwezinye izifundazwe eNigeria abebethi bazwelana kakhulu nezakhamizi zase-Imo - ezibhuqwa yindlala kodwa kuzogxunyekwa umfuziselo abangazi ukuthi ngowani. Abakuleli bebethi bayabonga kwiNigeria noma ingamthatha uMengameli Zuma ayohlala khona unomphela.
Konke lokhu kwenza siqhubeke nokuzibuza ukuthi kanti benzani abeluleki bakamengameli. Masethembe nje ukuthi ngeke sizwe sekuthiwa ukugxunyekwa kwalo mfuziselo nokuqanjwa komgwaqo ngoMengameli Zuma bekuwukubonga okuthile noma ubenxenxwa ukuba enze okuthile.
Siyacela ukuthi naye umengameli njengoba esasibambile lesi sikhundla, abheke ukuthi unyathela kanjani okhalweni nokhalo aluhambayo. Baningi kabi abafundi abebengaya emanyuvesi ngale mali okwakhiwe ngayo umfuziselo. Kasilwi nomengameli kodwa kuyadabukisa ukuthi kungamoshwa imali ngezinto ezingeke zibenzele lutho abantu.