Namanje umfowethu utoke ejele
MHLELI: Ngibingelele ngokuzithoba okukhulu, ngikhulumela umndeni wakwaMngoma, eNanda.
Siwundeni sikhala ngokuhlukunyezwa wumnyango wokuhlumelelisa izimilo. Ilunga lomndeni wethu liboshwe ngonyaka wezi-2001, lagwetshwa ngowezi-2003. Ngowezi-2015 kufike izisebenzi zasejele zasisayinisa, zasazisa ukuthi useyaphuma etilongweni.
Ngowezi-2016 zisifonele zathi masiphinde siqinisekise ikheli kodwa lutho umfowethu ukuphuma ejele. Lokhu kuyasihlukumeza ngaphezu kokuba kuhlukumeza yena ejele njengoba uze wayisa umnyango wamajele enkantolo nezinye iziboshwa ezi- yisi-8 baliwina icala lokungakhululwa ngoshwele.
UNgqongqoshe wezokuHlunyeleliswa kweziMilo, uMnu Michael Masutha, uze wavela kumabonakude exolisa ngokubambezeleka kwabantu abadonsa njengomfowethu. Siwundeni sifisa ukwazi ukuthi yini lena edala ukuba umfowethu angakhishwa ejele ngoba kabasho ukuthi akaziphethe kahle kodwa bavele bekhale ngokushoda kwezisebenzi.
Ngisho umyalelo wenkantolo abawunikwe zingama-25 kuNhlaba (May) nonyaka, othi udaba lomfowethu maluyiswe kungqongqoshe Masutha, kabawuhloniphi, kasisazi siwundeni ukuthi ngabe lona wumnyango wokuhlumelelisa izimilo noma ngobulala izimilo zabantu. Kasinayo imali yokukhokhela ummeli ngoba ungqongqoshe uzothatha yona le mali yentela ethathwa kithina sihlupheka ayoyilahla enkantolo ebe azi kahle ukuthi unephutha.
Kuningi futhi okungahambanga kahle kuqulwa icala lomfowethu, siyacela umnyango udedele umfowethu ejele esaphila, siyamdinga lapha ekhaya. Igama lakhe nguNhlanhla Mngoma usejele laseWestville medium B.
Ozithobayo Justice Mngoma