MAKUGXILWE KUBONA BOBUBILI UBULILI ENTSHENI
KUBUYISA ithemba eNingizimu Afrika ukubona kunabantu abazikhathaza ngokufundisa intsha yethu ngokuziphatha kahle ngendlela yesintu nangaleyo yesimanje. Lokhu kusho ukuthi bakhona abasakhumbula ukuthi inkunzi isematholeni.
Iqiniso wukuthi thina siyakhula futhi sizobuye sibashiye abantwana bethu - bekungaba kuhle sibashiye sesitshalile kubona izimfundiso eziqotho. Zibukeka zikhonyana izinhlelo ezilekelela amantombazane ukuba azithibe ocansini isikhathi singakafiki, engakavuthwa ngokwengqondo nemizimba ingakabi sesimeni sokuba angangena esigabeni sobudala. Emakhaya nasemalokishini iyabonakala inhlansi yomama begqugquzela ukuhlolwa kwezintombi nezinye izinhlelo ezifuze lezo eziwasizayo amantombazane ukuba afundiseke ngobungozi bokuziphatha budedengu nokuthatha izinqumo ezizobeka impilo yawo engcupheni.
Nasemakhaya ethu ibukeka iminingi imithetho eqinile eshayelwa amantombazane ukuze angashonelwa yilanga engaphandle kwamagceke asemakubo, angathunywa sekuhwalele aphinde aziwe nokuthi uma ephuma kubo aya kuphi, ahamba nobani futhi azobuya nini. Zinhle kakhulu lezi zimfundiso- ziyowasiza amadodakazi ethu. Kuyona yonke le mizamo emihle eyenziwayo ngamantombazane, ngibona sengathi kusuke kwagxilwa kakhulu kuwona kwalibaleka ukuthi kawaphili wodwa, bakhona abafana kuzona zonke izindawo lapho etholakala khona. Imithetho eshayelwa abafana nezimfundiso eziqondiswe kubona, kubukeka kungaqinile njengokwamantombazane.
Abafana kuye kuthi noma sekuhlwile ubabone besalokhu begcaluza emigwaqweni nasemakhoneni kuze kube sebusuku impela. Kweminye imizi kuze kudliwe isidlo sakusihlwa engekho umfana wakhona futhi engathunyiwe - uzophakelwa abekelwe ukudla afike ngaleso sikhathi afika ngaso, kungashiwo lutho, anikwe ukudla kuqhubeke nje sengathi wenze kahle. Ngibona sengathi lezi zimfundiso ezinhle ezigxile ohlangothini olulodwa, umthelela wazo ugcina ungazweli ngoba la mantombazane afundiswa okuyikhona, kulula ukuba abafana bawadidise ngoba bona kabafundiswa ngendlela efanayo futhi namatomu abukeka engaqinile kubona njengasemantombazaneni.
Kwesinye isikhathi uthola ukuthi abafana bathi beseneminyaka mhlawumbe eli-15 ubudala, babe sebenamalawu, sebezilalela ezindlini ezingaphandle kude nabazali. Lapho uthola ukuthi akekho umuntu omdala olawula ukuphuma nokungena kwabo kulawo malawu, bazibuyela ngesikhathi abasithandayo futhi nalawo malawu ayakhiywa umzali akazi nokuthi kukhonani kuwona. Umfana athi emncane kodwa aphathiswe okwensizwa esiqinile kumbe esebenzayo lapha ekhaya. Lowo mfana ophathwa ngale ndlela ekhaya, uma efika ngaphandle emphakathini nasesikoleni, imvamisa ukhombisa ukuthi yena useyinsizwa akasaphathiswa okomfana. Nasemantombazaneni kulula ukuwaqinela awakhombe le nale ngoba yena vele nakubo usenendlu yakhe aziphethe kuyona.
Kulula nokuthatha intombazane ngesikhathi sesikole aye nayo elawini lakhe ngoba nguyena oshaya umthetho kulona nokhiye uhlala kuyena. Kuvamile vele ngokwemvelo ukuba amantombazane alutheke kalula eluthwa ngabafana kodwa kuba ngcono uma izoluthwa ngumfana ofundisekile ngoba ngeke bajahele ezintweni ezijulile, ezizokhubaza ikusasa labo. Uma-ke iluthwe ngumfana oshodelwa yizimfundiso eziqotho, ilimala nazo izimfundiso ezinhle ngoba vele ngokwemvelo abafana banale nto yokulutha amantombazane kalula. Kangikubukeli phansi futhi kangikushayi indiva ukuthi intombazane efundiswe kahle iyakwazi ukuba nomgogodla wokuma izithibe, ilandele izimfundiso zabazali nezasemphakathini nasezikoleni, kodwa ngithi nabafana mabazithole ngezinga elifanayo lezi zimfundiso ukuze nabo bezokhula benezimiso nemigomo eqotho ezobakha babe ngobaba bakusasa, abafundiseke kahle, abazokwakha imizi eqotho ekusaseni labo.
Kungalesi sizathu ngifikelwa wukuthi nabafana bayazidinga izigcawu lapho bezokwakhiwa khona, babunjwe kahle ngezinkulumo ezakhayo ezizobafundisa ngabo nezigaba zabo zokukhula bese baphinde bafundiswe ngabantu besifazane ukuthi bangobani, bakhula kanjani futhi baphathwa kanjani. Ngibona sengathi abafana kuyobehlula ukulawula imizwa nemicabango yabo uma bengaqeqeshwa ngokufanele bese kuba sengathi namantombazane kawafundisekanga kanti aphazanyiswa ngabafana sebehluleka wukulawula eyabo imizwa nemicabango, bagcine sebesebenzisa amandla.
Uma sikubona kubalulekile ukwakha isimilo samadodakazi ethu, masikwenzeni nasemadodaneni ethu ukuze siqinisekise ukuthi bobabili sibahlomise ngokwanele ukuba babhekane nempilo futhi sibacije ngokwanele ukuthi banqobe izingqinamba abazohlangana nazo empilweni yabo. Ekugcineni siyoba nabazali bakusasa abafundiseke kahle abazaziyo izimiso nemigomo eqotho - ezobasiza bakhe eyabo imizi eqotho. Zinqunywa amakhanda ziyekwe nina bezul’ eliphezulu Makhosi Ndleleni (Bonakele) uMaZulu Zondo.Insika yaMathiyane. UThishanhloko waseMatatane Secondary School. mthiyanesgs@yahoo.com 082 752 7342