Lawula ukucasuka emsebenzini
Wonke umuntu uyaba nalo usuku olubi empilweni yakhe, azizwe ecikeka sengathi umhlaba ungavuleka ambozeke. Uma unosuku olubi kwesinye isikhathi kuyenzeka ugcine usuxabana nabantu osondelene noma osebenza nabo ngaphandle kwesizathu.
Kubalulekile ukuba uma usemsebenzini usebenze ngendlela engeke ihlukumeze omunye uzakwenu ngoba lokho kungabeka ikusasa lakho kuleyo nkampani engcupheni. Ngakho kungakuhle ukuba uthole ulwazi lokuthi yini okumele uyenze ukuze usebenze ngaphandle kokuxakazisana nozakwenu emsebenzini uma uvuke “on the wrong side of the bed”.
Uma usemsebenzini kuyakuphoqa ukuba uhlale u- professional ngaso sonke isikhathi ikakhulukazi uma usebenza umsebenzi okuxhumanisa ngqo namakhasimende. Kuhle ukuba uziphathe ngendlela efanele ngisho noma ngabe kukhona ozama ukukunyathela amakhona. Ukucasuka emsebenzini yinto ekhona kodwa okumele ukuqikelele ukuthi wenzani uma usucasukile.
Kubalulekile ukuba ungacasuki ngendlela ezokwenza ubukeke njengomuntu ongakwazi ukuzibamba. Zibambe kuze kube umoya wakho uyehla ngaphambi kokuba uqophisane ngamazwi nalowo okucasulayo.
Zijwayeze ukuzinikeza ikhefu lokushaywa umoya uphumele ngaphandle. Uma indlela osebenza ngayo ingakuvumeli uphumele ngaphandle kungakuhle ujwayele ukuya endlini yangasese uwashe izandla noma ugeze ubuso kancane ngamanzi abandayo uthi ukuqaqeka kancane. Kwesinye isikhathi kungakusiza nokuba uhlale kancane khona e- toilet usazama ukwehlisa umoya.
Kumqoka ukuba uqale wamukele ngaphakathi kuwena ukuthi awukho esimeni esihle, unenkinga. Lokhu kungasiza kakhulu ozakwenu ukuba baqaphele abakushoyo eduze kwakho noma kwesinye isikhathi baziqhelelanise nawe ngalolo suku.
Kuthiwa isitebhisi sokuqala sokubhekana nanoma iyiphi inkinga wukwamukela ukuthi unenkinga. Sonke sinalo ulwazi lokuthi umuntu ubanjani uma enosuku olubi. Kwesinye isikhathi ukwazi ukuthi unosuku olubi kungakwenza nawe uziqoqe kwezinye izinto ezingakucasula.
Qinisekisa ukuthi awukhipheli ingcindezi yakho kubantu abangahlangene nhlobo nayo.
Kunengoma yezenkolo engiyikhonzile enamazwi athi “Bala Izibusiso Zakho”. Kubalulekile ukuba ungazikhohlwa izinto obusiswa ngazo futhi uqinisekise ukuthi zihlale zisekhanda lakho, uyazibhala ezinkundleni zokuxhumana noma ngabe yikuphi lapho ongazibhala khona. Ukubala okuhle empilweni yakho kwenza ukhohlwe okubi okwenzekayo ngoba uma ungase ubale kuncane okubi kunokuhle.
Uma ubheka okuhle kuzokucacela ukuthi noma ngabe yini ekucasulile ayithi shu kunezinto osuzizuzile empilweni nosudlule kuzona. Kwesinye isikhathi kungashintsha nendlela ozizwa ngayo. Ukuba nosuku olubi kakuchazi ukuthi kumele uzakhele izitha.
Kumele wazi ukuthi ayikho into engadluli, okubalulekile wukuthi lolo suku lungadluli nezinto ezibalulekile kuwena empilweni. Umsebenzi ubalulekile kanjalo nabangani ngakho indlela obaphatha ngayo uma unganeme kugcina sekwenze walahlekelwa okukhona ngokungekho.
Ukuthi unosuku olubi akuchazi ukuthi ngeke ukwazi ukusiza umuntu noma awukwazi ukujabulisa omunye umuntu.
Eqinisweni iningi labantu abaphumelele bakubeka kucace ukuthi ukusiza umuntu noma ukwenzela omunye okuhle kungakusiza nawe uzizwe kangcono. Ukumoyizela nokuba nesihe kwabanye kuyakusiza ubheke impilo ngenye indlela. Kuhle ukuba ube wushintsho olufunayo kubantu ukuze nawe bakuphathe ngendlela othanda ukuphathwa ngayo.