Indida ngomklomelo kaMthembu
Wathenjiswa nguMasipala iHarry Gwala enqobe iComrades
ISIDIDIDI ngomklomelo wengqwele yeComrades Marathon uBongumusa Mthembu njengoba kuvela ukuthi imali ayethenjiswe yona ngumasipala wangakubo iHarry Gwala ngoNtulikazi (July) ngesikhathi umhlonipha ngokunqoba iComrades akakaze ayithole kunalokho lo masipala udlala umacashelana.
UMthembu ongowokuzalwa eBulwer, maphakathi nesifundazwe ngaphansi kwalo masipala wenzelwe umcimbi wokumhlonipha yiwo lo masipala oholwa nguMluleki Ndobe wathenjiswa nomklomelo wemali ongu-R30 000.
Lo mcimbi ubumhla zingama-22 kuNtulikazi eBulwer.
Ubuhanjelwe nanguDkt Nkosazane Dlamini Zuma naye ongowokuzalwa kuyo le ndawo.
ILANGA lithole ukuthi kuze kube yimanje uMthembu nekilabhu yakhe abakayitholi imali abathenjiswe yona yilo masipala.
Kuthiwa ikilabhu isisabise ngokuyiduba le mali ngoba uma bekhuluma nomasipala ubashonisa ngapha nangapha.
UMthembu ebuzwa ngalolu daba uvumile ukuthi kuze kube yimanje akakayitholi imali athenjiswa yona kodwa unethemba lokuthi kuzokuthi kuphela lo nyaka abe eseyitholile.
UZekhethelo Ndlovu okhulumela uMasipala uthe uyakweshwama ukuthi uMthembu nekilabhu abakayitholi imali abathenjiswa yona. Uthe uzoxhumana nehhovisi lezezimali noma athinte iMeya ukuzwa ukuthi kubambeni.
UMthembu noCamille Herron wase-United States of America (USA) bahlonishwe ngamablazer yiComrades Marathon kwi-Old Mutual Spirits of Comrades Awards ngoLwesihlanu eThekwini.
Abanye abahlonishiwe nguHideo Takano, uSteven Vienings, uVishal Kanjee, uCharles Baloyi weDaily Sun obe yintatheli evele- le, uTracy Bamber noMike Cowling. UMthembu udlulise ukuxolisa kuHulumeni waKwaZuluNatal ngokungabi yingxenye yokwethulwa ngokusemthethweni kwamaSalga Game anonyaka obekwenziwa ngosuku olufanayo eRichards Bay.
Kusenjalo, kwaziswa abagiji- mi baKwaZulu-Natal ukuthi iMuden 25km ehambisana ne-10km obekufanele ibe ngeSonto ngeke isaba khona kanti abasubathi besifundazwe bazokhiphana inkani kwiMerewent 10km ezokuba ngeSonto ezinkundleni zemidlalo eDhubri. Ngolwazi kuthintwa uPat Pather kwethi: 073 495 5521.