WINA IMIFUNDAZE NELANGA NE-BEREA TECH
UTHOKOZANI “Mzekezeke” Mshengu ozakhele udumo egijima kwiLamontville Golden Arrows ujikele iSummerfield Dynamos egijima South African Football Association (Safa) KwaZulu-Natal ABC Motsepe League waqoma iDurban FC egijima esigabeni esifanayo.
IDynamos ibhudluzwe ngo-4-0 yiDurban FC kowe-ligi ngoMgqibelo ntambama eChatsworth Stadium, eThekwini.
Amagoli eDurban FC ashaywe nguBongani “Mbu” Ngcobo amathathu noLwazi “Mlenze” Mbongwa. Leli phephandaba like labika ukuthi uMshengu angase asayine neDymanos. Nokho kuthiwa imali athenjiswe yona yiDurban FC imenze wajika umqondo.
Izindaba zokusayina kukaMshengu ziqinisekiswe nguThabani “Fish” Zondo oyimenenja yeDurban FC.
“Yiqiniso ukuthi uMshengu usayine nathi ngokugcwele.
Simsayinise ngenhloso yokuthi azoba wusizo kubadlali abaseba- ncane ekilabhini,” kusho uZondo.
UMvoti FC uhlule iNatal United ngo-2-1 ngoMgqibelo ntambama koweligi eKing Edward, eGreytown. Amagoli oMvoti FC ashaywe nguSamkelo “Villa” Khoza, eleNatal leza noSandile “Kea” Dlamini. ISes’khona FC iguqise iLadysmith United ngo-2-1 koweligi ngoMgqibelo ntambama eSJ Smith Stadium.
Amagoli eSes’khona abekwe enethini ngo-Ayanda “Magagula” Sithole noNhlakanipho “Tso” Ngubane, kwathi eleLadysmith lona lashaywa nguMbudi Mokoena.
Isiyonke imiphumela yemidlalo yeSafa KZN ABC Motsepe League imi kanje:- Drakensburg FC 0, Wanderers 1 ; Juventus 2, KwaDukuza FC 2; Maritzburg City 1, Milford FC 3; Ses’khona 2, Ladysmith 1; Summerfield 0, Dbn FC 4; uMvoti FC 2, Natal United 1.
Khonamanjalo umdlalo weAshley United neKwaMashu All Stars obekufanele ube ngoMgqibelo eS.J Smith kawubanga usaba khona ngenxa yobuhixixhixi bokuqokwa konondweba kule nhlangano.