Bakhumbula eGibhithe ngentuthuko
Konke obekukhona ngesikhathi sobandlululo kushabalele
UKHALA esabantwana bakwa-Israel - abakhala kuMose bathi bekungcono eGibhithe - bephakathi nogwadule bengafiki ezweni lesethembiso umphakathi waKwaNobamba eWeenen, maphakathi neKwaZulu-Natal othi intuthuko ngabakwekazi.
Amalunga omphakathi wakule ndawo asho kugcwale umlomo ukuthi yayingcono kakhulu impilo ngesikhathi kusabusa uhulumeni wamaBhunu kule ndawo kanti selokhu kuthathe owentando yeningi ngonyaka we-1994, le ndawo ibuyela emuva.
Uthi ngesikhathi sobandlululo kuningi obekwenzeka kule ndawo. Bekukhona ibhange, indawo ihlanzekile, imigwaqo edolobheni inetiyela kodwa manje konke lokhu sekushabalele, lo mphakathi ubona sengathi uhulumeni kawazi nanokuthi kunendawo enjengalena ngoba kakukho ngisho izinhlelo zokuyithuthukisa. Uthi kwakukhona ngisho isibhedlela kodwa ma- nje sekukhona umtholampilo nje.
Phakathi kwezinto abantu bakule ndawo abakhala ngazo, wukungangeneleli kukaMasipala iNkosi Langalibalele ekuvalweni kwesikiti (skuit), okuyindawo okuboshwa kuyona izinkomo uma zimoshile. “Lapha besikhokha u-R50 ukukhipha inkomo uma itholakale yonile kodwa manje sesiyafa njengoba sekukhona ovule indawo yakhe obopha kuyona izinkomo zethu sikhokhe u-R450 ngenkomo iyinye,” kusho uMnu Phakanyiswa Ndlovu oyisekela likanobhala wenhlangano iKusasa Lesizwe Trust of Weenen Development and Culture.
Le nhlangano bathi bayisungule ngoba bebona khona ukuthi kumele bazisukumele ukuze basizakale ngoba babona sengathi uhulumeni kawuzimisele ngokuthuthukisa le ndawo.
“Akukho esingakwenzile, sikhulume namakhosi nezinduna kwayikhona ukuthi kakukho ezandleni zabo ukuthuthukisa le ndawo noma benalo uthando kodwa ngamakhansela nomasipala abasenzela phansi,” kusho uMnu Ndlovu.
UMnu Mphakamiseni Sibisi ongusihlalo wale nhlangano, uthe izinga lobubha liphezulu kakhulu kule ndawo, okwenza intsha ingasebenzi.
“Kakukho ngisho izindawo ezinjengamafemu abantu abangathola kuzona imisebenzi. Kwaphinde kwavalwa nendawo eyayiyimakethe yemfuyo lapho abantu ababedayisela khona izinkomo zabo, bekwazi ukuzenzela imali. Le ndawo umasipala kumele ngabe uyasivulela yona kube yilapho abantu behwebela khona kodwa abadayisa imfuyo kudingeka bayohlala edolobheni nemfuyo abayidayisayo,” kusho yena.
IKusasa Lesizwe lithi okusenziwe wumasipala wukwakha izindlu zokudayisela nerenki yamatekisi nje kuphela edolobheni. Lithi uma abantu befuna amabhange kumele bagibele ngenkulu imali baye edolobheni eMnambithi noma e-Estcourt. “Uma udinga isitatimende sasebhenki, kumele ugibele ngeshisiwe imali lena uye kwamanye amadolobha ngoba kwelethu kakukho ngisho ibhange leli kodwa ngesikhathi sobandlululo lalikhona,” kusho uMnu Sibisi. Kukhalwa nangomtapo wolwazi okuthiwa kuwona kunesimumathalwazi (computer) esisodwa vo, naso esiqale ukuba khona ngonyaka odlule.
ILANGA lihambe laze lafika kuwona umtapo wolwazi laphinde lakhuluma nezisebenzi zakhona ezishilo ukuthi sinye isimumathalwazi esisebenzayo, okuba ngenkulu inkinga uma izingane zesikole zifuna ukusisebenzisa.
“Lapha kufika izingane eziphuma ezikoleni eziyinqwaba ezinye zize zibuyele emakhaya zingasizakalanga ngoba zisuke ziningi kakhulu. Kwesinye isikhathi zigcina sezibhala into eyodwa zonke ngoba nazo izincwadi kazanele. Ezinye zize zihambe lapha zikhala ngoba zingafuni ukubhala into ebhalwe ngezinye. Cishe zingaphezulu kwama-20 izikole ezisebenzisa le ndawo,” kusho esinye sezisebenzi ezificwe kule ndawo.
Zitshele leli phephandaba ukuthi sekunesikhathi eside umasipala uthembisa ukuthi kuzogxunyekwa isakhiwo esikhulu kunalesi esikhona kuphinde kunezelwe nezincwadi nazo izimumathalwazi.
Okunye okufike kwabonwa yiLANGA wukuthi izingane kazisizakali, ikakhulukazi ezingakwazi ukusebenzisa isimumathalwazi ngoba akekho umuntu obekelwe ukuzilekelela.
Ngesikhathi ithimba laleli phephandaba lihambela izindawo ezahlukene, lidlule kwenye indawo yokucima ukoma ebigcwele intsha, ikakhulukazi yesilisa, iziphuzela kungathi wuLwesihlanu ebusuku. “Buka nje wuLwesibili namhlanje, kakukashayi nehora lokuqala emini kodwa intsha igcwele kule ndawo ngoba kayisebenzi, seyizinikele etshwaleni nje,” kusho elinye ilunga lomphakathi.
IMeya yaseNkosi Langalibalele, uNkk Jabulile Mbhele, ivumile ukuthi ezinye izinkinga amalunga omphakathi akhuluma ngazo, bayazazi bewumasipala kanti kuyimanje bamatasa ngokuzilungisa ngokusebenzisana nohulumeni wesifundazwe nokazwelonke.
“Esikwaziyo wukuthi iWeenen yindawo enezolimo kakhulu kanti sisebenzela ekutheni umphakathi wakhona siwulekelele kuzona.
"Njengoba ngikhuluma nawe nje, uNdunankulu waKwaZuluNatal, uMnu Willies Mchunu, uzovakashela le ndawo ingakapheli le nyanga njengoba ebize imbizo ukuyohlala nomphakathi akhulume nawo,” kusho yena.
Uthi umtapo wolwazi nezikole kungaphansi komnyango wezemfundo abasebenzisana nawo kanti uma sekunesidingo sokuba unwetshwe, kumele kube nocwaningo olwenziwayo oluzosho ukuthi lesi sakhiwo sesisincane ngenxa yokwanda kwezingane.
“Engingakusho njengamanje wukuthi njengoba kunesimumathalwazi esisodwa kakulungile lokho ngoba kuliqiniso ukuthi kasanele. Njengomasipala sizozinezela futhi lokho sizokulungisa ngokushesha,” kusho imeya.
Iphethe ngelokuthi iyajabula ukuthi inhlangano enjengeKusasa Lesizwe iphakamise izinto ezinjengalezi.
“Nodaba lweskiti siyaluzwa kodwa okubaluleke kakhulu wukuthi inhlangano lena isondelane nehhovisi lemeya ukuze sikwazi ukuxoxa kuyiwe phambili,” kusho imeya.
nonhlakaniphos@ilanganews. co.za