IFU ELIMNYAMA KUKHOTHAMA INKOSI KHAWULA
IGUTSHUZELWE yifu elimnyama iNdlu yabaHoli boMdabu KwaZulu-Natal emuva kokuba ngoLwesihlanu kukhothame iNkosi Bhekamahlongwa Boy Khawula (59) ( osesithombeni) yesizwe sakwaHlongwa ngoLwesihlanu - emuva kokuhlabeka isikhathi eside.
Ngokusho komfowabo wenkosi, uMnu Mntomuhle Khawula, ikhothamelele esibhedlela iParklands, eThekwini.
“Besekunesikhathi eside inkosi ingaphilile, njengoba isikhothama ngoLwesihlanu. Umndeni uhlanganile ngoMgqibelo kwavunyelwana ngokuthi izotshwala ngoMgqibelo esibheke kuwona,” kusho uMnu Khawula.
Uthi njengomndeni bazisa umphakathi waseMahlongwa namaphethelo ukuba ubuyele ngasekhaya kwazise abantu abaningi abangaphansi kwesizwe senkosi basebenza kude.
“Siyawunxusa umphakathi waseMahlongwa namaphethelo ukuba ubuyele ngasekhaya njengoba sizoyitshala ngempelasonto inkosi.
"Konke kuzokwenzelwa esigodlweni sayo kusukela ligamenxe elesi-9 ekuseni,” kusho yena. UMnu Khawula uthi inkosi beyingumuntu wabantu, ithanda ukuhlala nabo. “Ubungeke usho ukuthi uyinkosi njengoba abantu bebezihlalela naye, futhi ekuthokozela ukuchitha isikhathi nabo. Esikubonga kakhulu ngaye wukuthi ulethe ukuthula okuyisimanga kulesi sizwe njengoba ngisho nezinga lobugebengu liphansi kakhulu kule ndawo, kuvunguza kakhulu umoya wokuzwana,” kusho uMnu Khawula.
INkosi Khawula ithathe isihlalo sobu- khosi ngowezi-2001 ngemuva kokukhothama kukayise iNkosi uCalalakubo Khawula. Ishiye undlunkulu wayo nabantwana ababili.
Okhulumela uMnyango wezokuBusa ngokuBambisana nezoMdabu KwaZuluNatal, uMnu Lennox Mabaso, uthi ungqongqoshe walo mnyango udlulisa ukukhalisana nokuzwelana nomndeni weNkosi Khawula.
“Siyitholile imibiko ngokukhothama kweNkosi Khawula engumfowabo welunga lePhalamende, uMnu Mntomuhle Khawula. Njengomnyango sigqemeke engeqiwa ntwala ngokukhothama kwayo kwazise ibiyinkosi engakakhuli kakhulu nebesisabona kusazoqhubeka kahle ukusebenzisana kwethu nayo,” kusho yena.
Uthi ungqongqoshe obambile kulo mnyango, uNkk Weziwe Thusi, uzovakashela umndeni wakwaKhawula namuhla ngoMsombuluko ukuyobhonga emswanini.