Baphika inkosi embangweni wendawo
Bathi ngeye-trust
AYAVEVA amalunga omphakathi ongaphansi kwesizwe sakwaSithole eNkandla, maphakathi neKwaZulu-Natal ngowesilisa abathi uzenza inkosi - ibe ikhona inkosi idla anhlamvana.
Athi asekhathele yisenzo sikaMnu Ndondo Mdluli asichaza njengokubukela phansi isihlalo seNkosi Khumbulani Sithole njengoba emsola ngokuzenza inkosi yakule ndawo.
Kubikwa ukuthi esigamekweni sakamuva, kunabantu abalande izincwadi ehhovisi lekhansela lakuwadi 8, uMnu Thulani Mbuyisa, bathola kubhalwe kuzona uMnu Mdluli esikhundleni seNkosi uSithole. Umthombo
weLANGA okule ndawo, uthi sesiside isikhathi bezama ukuxazulula udaba luka-Mnu Mdluli ukuze ayeke ukuzenza umholi womphakathi ekubeni ikhona inkosi.
Uthi kuyimanje kunohlelo lokwakhiwa kwezindlu abezwe kuthiwa luzoqala endaweni kodwa iNkosi Sithole kayaziswanga ngalo. “Ngokujwayelekile uma kuzoba khona uhlelo lwentuthuko emphakathini ongaphansi kwenkosi, iyabikelwa, lwethulwe kuyona ngaphambi kokuba kuqale ukwakhiwa. "Kulokhu sethukile nje sesizwa kuthiwa luzoqala ekubeni iNkosi Sithole ingatshelwanga.
"Siyasola ukuthi lolu hlelo lwethulwe kuyena uMdluli ngoba uyaziwa ukuthi uzibiza ngomholi emphakathini. Esifuna asicacisele khona wukuthi ungumholi onjani ngoba akasiyona induna, akalona ikhansela, futhi akayona inkosi. Okunye esifuna ukukwazi wukuthi igama lakhe lingena kanjani encwadini yekhansela futhi libhalwe lapho kufanele kufakwe khona elenkosi ephethe.
"Kuyacaca ukuthi lo muntu usaqhubeka nokuzenza inkosi,” kusho umthombo. Esinye isakhamuzi esikhulume neLANGA, sithi naso sesike sazibona lezi zincwadi ezibhalwe igama likaMnu Mdluli njengenkosi. uthi bazimisele ukulwa, uMnu Mdluli achaze ukuthi kungani ezibiza ngenkosi endaweni. Nekhansela kabeneme ngalo ngoba liyayazi iNkosi Sithole. “Kuyasethusa ukuthi nekhansela liyakuvuma lokhu ngoba lazi kahle ukuthi inkosi yakule ndawo nguSithole,” kusho yena.
UMnu Mbuyisa uthe kabayazi inkosi yakwaSithole endaweni yabo. Uthi ngokwazi kwakhe eNkandla kunamakhosi ali-17 bese kuba khona isikhwama ( trust) lesi esiholwa nguMnu Mdluli. Utshele ILANGA ukuthi kuwona wonke la makhosi ali-17, kayikho eyakwaSithole. “Leyo ncwadi ephuma ehhovisi lami bekumele ibhalwe ukuthi trust fund esikhundleni senkosi ngoba kasinayo thina inkosi kule ndawo.
"Lokhu abakushoyo kangikwazi, nalolu hlelo lokwakhiwa kwezindlu abakhuluma ngalo kangilwazi. Engikwaziyo wukuthi kunezindlu ezimbili ezingaphansi kohlelo uSukuma Sakhe, lapho kusuke kubhekwa imindeni edonsa kanzima engenandawo yokuhlala bese kwakhelwa yona. Yizona kuphela izindlu engizaziyo ezizokwakhiwa,” kusho uMnu Mbuyisa.
Uthi akaqali ukuyizwa eyokuthi yindawo yeNkosi yakwaSithole le athi iphethwe yisikhwama, kodwa yinto engekho nje. "Lowo wumkhuhlane okhona endaweni, okungasho ukuthi uliqiniso futhi sinobufakazi balokho,” kuphetha uMnu Mbuyisa. IMeya yaseNkandla, uMnu Thami Ntuli, ithe kayinalo ulwazi ngalolu daba.
UMnu Mdluli uthe kabakhile endaweni yenkosi futhi kakukho okubahlanganisa nayo. Uthi bona bangaphansi kwesikhwama. “Laba bantu bafike bakha emadlelweni ethu manje sebegijima bathi yindawo yabo, kakulona iqiniso lelo. Udaba lwabo siyalwazi futhi ludala,” kusho uMnu Mdluli.
Uvumile ukuthi izincwadi uyazisayina njengoba engumholi womphakathi kanti unomkhandlu asebenzisana nawo kodwa kabanayo inkosi. Ithintwa iNkosi Sithole, ithe izwile ngezincwadi eziphuma ekhanseleni ezibeka uMnu Mdluli njengenkosi. Uthi le ndawo okukhulunywa ngayo ngeyakwaSithole futhi kunamathuna abo kuyona. "Lolu daba sizolusukumela, ngisazohlangana nendlu yakwaMhlumayo ukuze sizoxoxa kuvele ukuthi le nkosi iqhamuka kuphi.
"Le ndawo abayishoyo ngeyakwaSithole, kukhona ngisho idlinza leNkosi uMaphitha kuyona. Nalo ikhansela liyazi ukuthi yimina inkosi. Phambilini bekunekhansela uSphaza Majola ebelazi kahle ukuthi yimina inkosi futhi uma kunezinhlelo zentuthuko endaweni beliza kimina lizozethula. Kuyaxaka ukuthi lokhu sekuyashintsha uma sekungena leli khansela elikhona manje,” kusho iNkosi Sithole.
UMnyango wezokuBusa ngokuBambisana nezoMdabu KwaZuluNatal, kuze kwashaya isikhathi sokuloba ungakabuyeli kuleli phephandaba mayelana nalolu daba.