SIKHATHAZWA NGABASHONAYO EMIZILENI YEZITIMELA OTHONGATHI
MHLELI: Amaphoyisa asoThongathi akhathazekile ngesibalo sabantu abashonayo bezama ukuwela imizila yezitimela. NgoMgqibelo womhla zili-14 kuMfumfu (October), indoda eneminyaka engama-59 ishayiswe yisitimela ikulayini waso ngakwaFrasers, amaphoyisa avule idokodo okuyimanye liyaphenywa ngabaseshi basoThongathi ukuze bathole lonke iqiniso mayelana nokulimala kukamufi.
Isidumbu sithathiwe sayiswa emakhazeni lapho sizohlinzwa kubhekwe imbangela yokushona kukamufi. Umphakathi kubalulekile ukuba ube nolwazi lokuthi olayini besitimela baphethwe yinkampani ezimele yakwaTransnet, okusho ukuthi abantu abahamba ngezinyawo kabavumelekile ukungena noma bawele imizila yezitimela.
Uma utholakala endaweni enemizila yezitimela noma uyeqa, kuyicala amaphoyisa anelungelo lokukubopha. Iqalile le nyanga (yezokuthutha) sebeyisihlanu abantu ababoshiwe, abatholakele beqa olayini besitimela endaweni engafanele. Kwesinye isikhathi uma isitimela sidlula, kungenzeka uthi uyawela ngoba uthi sesidlulile ngenxa yomsindo, ungezwa nokuthi kukhona esinye esiqhamukayo esiphambana naso bese uyashayiseka ulimale noma ushone ngoba sona kasikwazi ukuma kalula njengemoto.
Siyawucela umphakathi ukuba uyeke ukuwela emizileni yezitimela, kunalokho abantu mabasebenzise amabhuloho abekelwe abahamba ngezinyawo.
Ukunqamulela kuyingozi, bheka nje kulo nyaka uqalile sekube nezigameko eziningana lapho abantu beshayiswa yizitimela bezama ukweqa imizila ezindaweni lapho bengavumelekile ukuwela khona.
Siyacela umphakathi ongaba nolwazi ngokulimala kowesilisa ngaseFrasers ngoMgqibelo odlule athintane namaphoyisa asoThongathi, athinte uconst CT Mzizi kwethi: 032 944 9925. Uma ungafuni igama lakho laziwe, ungashayela amaphoyisa kwethi: 0800 10111.