OweChippa uphumela obala
Ukhwantalala belumbambile esaba ukuxoshwa
UMQEQESHI weChippa United uTebogo Moloi udalule isifo ebesimuhaqile ezakhe ziguqisa ngo-2-1 iCape Town City kowe-Absa Premiership izolo ngeSonto ntambama eSisa Dukashe Stadium, eMonti.
Amagoli eChippa ashaywe ngo-Abel Mabaso ngomzuzu wama-50 noKatlego Mashego ngowama-72, kwathi eleCity lokubika ekhaya lashaywa nguLyle Lakay ngomzuzu we-18.
UTebogo Moloi ocija iChippa obeqala ukunqoba umdlalo selokhu eqhoqhobale lesi sikhundla uveze ukuthi ubengasalali wukhwantalala kwazise imiphumela ibimuphika.
Kuvela ukuthi usinde ezembeni kwazise umnikazi wale kilabhu uSiviwe “Chippa” Mpengesi akanaso isineke sokubekezelela umqeqeshi ongakhiqizi imiphumela uyamxosha.
“Bekunzima ukhwantalala belungimise kabi umuntu uzoke alale kamnandi emuva kokunqoba lo mdlalo.
Bengikulindele ukuthi iwini yami yokuqala iyeza kodwa bengingaphathekile neze kahle njengoba imiphumela ibisiphika.
Ngiyajabula kakhulu ngama- phuzu amathathu esiwatholile umuntu ozoke alala kamnandi,” kusho uMoloi.
UBenni McCarthy ocija iCity usole abadlali bakhe ngokungafuni ukudlala ngokuzinikela.
“Ngesiwombe sokuqala sidlale kahle bekufanele sihlohle inqwaba yamagoli.
Ngesesibili akekho noyedwa umdlali wami okhombise ukuthi ufuna ukudlala bavele bangenza lutho.
Sihluliwe futhi kuzofanele sizame ukushintsha ukwenza,” kusho uMcCarthy.
Komunye umdlalo we-Absa Premiership, iBaroka FC ihlulwe okokuqala ngale sizini iguqiswa ngo-1-0 yiBidvest Wits izolo ngeSonto ntambama ePeter Mokaba Stadium, ePolokwane.
Igoli leWits libekwe enethini nguVincent Pule ngomzuzu wama-43.
Imiphumela yemidlalo yeAbsa Premiership ngempelasonto ihambe kanje:
Baroka FC 0, Bidvest Wits 1; Chippa United 2, Cape Town City FC 1; Ajax Cape Town 2, Bloemfontein Celtic 1; Free State Stars 1, Platinum Stars 1; Mamelodi Sundowns 1, AmaZulu FC 2; Golden Arrows 2, Polokwane City 2, Kaizer Chiefs 0, Orlando Pirates 0.