Umgadli welePSL umataniswa neChiefs
IziMpofana ziphumele obala ukuthi zifuna umgadli
IKAIZER Chiefs okungenye yamakilabhu ahlonishwayo ebholeni lakuleli imataniswa nomgadli ovutha engabaselwe kwi-Absa Premiership.
IziMpofana ziphumele obala ukuthi zisemkhankasweni wokuthungatha umgadli.
Zikubeke kwacaca ukuthi zimfuna kuleli nangaphandle kwakuleli.
Selokhu zimemezele ukuthi zifuna umgadli azikamtholi yize bekhona abafikayo bezozama inhlanhla kodwa bachithwe.
Nalabo le kilabhu ebathengile kuqala isizini abakhombisi ukuba bukhali njengoba kuvele imibiko yokuthi khona abazochithwa uma sekuvulwa iwindi lokudayiselana ngabadlali ngoMasingana (January), okubalwa kubona uRyan Moon obesuka kwiMaritzburg United.
Leli phephandaba lihabule ngemithombo yalo engaphakathi kwiChiefs ukuthi umqeqeshi wale kilabhu uSteve “Mphathi” Komphela uphakamise igama likaRodney Ramagalela ongumgadli wePolo-kwane City ukuba athengwe yile kilabhu uma sekuvulwe leli windi lokudayiselana ngabadlali.
URamagalela uvutha engabaselwe kulezi zinsuku njengoba engalibheki ipali.
URamagalela akamusha neze ebholeni lakuleli njengoba eke wasayiniswa yikilabhu enkulu kuleli iMamelodi Sundowns kodwa wangenza kahle kuyona.
Uqale ukugqama esadlalela iBlack Leopards nalapho agcine ebizelwe khona eqenjini lesizwe lika-Under 23 ngonyaka wezi-2011.
Leli phephandaba libuza uBobby Motaung oyimenenja jikelele yeChiefs ngalolu daba uthe: “Angeke ngikwazi ukuphawula ngabadlali abanezinkontileka namakilabhu abo.
Ngingakuqinisekisa ukuthi umgadli sisamdinga njengoba wonke umuntu azi ukuthi asikamtholi.
Kodwa-ke lokho akusho ukuthi kufanele ngikhulume ngabadlali bamanye amakilabhu,” kusho uMotaung.
URamagalela uthi angakujabulela ukuphinde athole ithuba lokugijima ekilabhini enkulu.
“OkweChiefs bekungakafinyeleli kimini kodwa lokho akuchazi ukuthi yinto engekho ngoba ngeke wazi yibhola leli.
"Kodwa-ke ngingakujabulela ukuphinde ngidlale ekilabhini enkulu.
"KwiSundowns angihlulekanga angikholwa ukuthi nginikwe ithuba elanele ukuzibonakalisa kuyona,” kusho uRamagalela.
KwiSundowns angihlulekanga, angikholwa ukuthi nginikwe ithuba...