Masingafunzwa ipolitiki yodwa
MHLELI: Ngibhala le ncwadi ukuzwakalisa ukungeneliseki ngendlela iSouth African Broadcast Corporation (SABC) esiphethe ngayo.
Le nhlangano kuke kwaba nomshado wasebukhosini bamaNgisi, safunzwa wona sivezelwa kumabonakude. Nansi nengqungquthela yangoZibandlela (December) isiseduze nje, uzobona sigxingxwa ngemikhankaso yamaqembu, kungakhathaleki ukuthi ngabe bonke abantu ebasakazelayo bayayilandela yini kwapolitiki leyo.
Siyavuma, yonke into isetshenzwa ngemali, okungenzeka laba engikhala ngabo basuke bekhokhile kodwa phela nathi siyawakhokhela amalayisensi okusakazelwa.
Yini uma kunemigubho yesintu njengoMkhosi woMhlanga, oweLembe, owokweshwama neminye ethinta thina maZulu nezinye izizwe zendabuko eNingizimu Afrika singavezelwa yona iqala ize iyophela njengoba kwenziwa kwezombusazwe nalapha kugcagcelwa uMntwana wasemaNgisini?
Yini edala ukuba imikhosi yakomkhulu (KwaZulu) ingamakethwa ngendlela emisakwazweni nakumabonakude njengoba kwenziwa kugujwa unyaka nenyanga esikuyona kaMnu Oliver Tambo? Kuyona yonke imisakazo yakwaSABC uma uvula, uzwa kuthiwa sekusele izinsuku eziwukuthi kufike usuku lokuzalwa kukaMnu Oliver Tambo, kanjalo nakumabonakude yileso. Uphinde uthi uyezwa… “Lena yinyanga kaMnu Oliver Tambo’’. Besingabalelwa ngani izinsuku ezisele kufike usuku lokukhothama kweSilo uShaka?
Kungani ngoMandulo (September) besingatshelwa ngenyanga yeSilo saKwaDukuza (iSilo uShaka)? I-SABC kumele yazi ukuthi njalo neboni laze labonwa ukuthi libelethe indoda. Nani le nsila yabamhlophe lapha kini siyayibona, nisifunza umbusazwe niyeka ukusifunza ngobukhosi, imikhosi namaqhawe akithi!
Kubukeka sengathi sesifikile isikhathi sokuba sidube konke okuphathelene nale nhlangano yezokusakaza. Sesifikile isikhathi sokuba silwele ukuba kugqanyiswe okwakithi hhayi ukufunzwa umbusazwe futhi weqembu elilodwa.
Le nto esiyibona yenzeka isenza sisale sizibuze ukuthi kuyoba nini iSABC iyizikhothangqoko zamaqembu asuke ehola umbuso. Kusahola ontamolukhuni nanisifunza ngokuhambisana nabo, namhlanje ngoba sekubusa iqembu likaMnu Tambo, senisifunza okuhambisana nalo.
Ngiyazisa mhla kwaphatha elinye niyophinda nijike nisifunze ngalo. Qha sikhathele wukufunzwa ngesingakudli sifuna ezithinta thina nemizwa yethu, sifuna ezithinta ubuthina nobukhosi bethu. Masisakazelwe imikhosi yethu, ngabe kangibenzi ubulungiswa ngingabongi ubaba u-Edwin Mncwango nobaba uThemba Fakazi be-1 KZN TV .
Lesi siteshi siqophe umlando senza osekwehlule ontabakayikhonjwa sasisakazela ukusuka nokuhlala kwaze kwayophethwa ngoMkhosi woMhlanga.
Yenza lokho nje, inanohlelo lwasebukhosini olusibikela ngakho konke okuthinta imikhosi nemicimbi ethinta iSilo, indlunkulu nezindaba nje ezithinta umdabu. Yibambeni kanjalo-ke 1 KZN. Wena SABC ake uyozinuka amakhwapha.
Ngiyafisa nje nokwazi ukuthi kazi nibakhetha kanjani abantu enibamemela ukuba bayokhuluma ngomlando nangamasiko ezinhlelweni zenu, ikakhulu emsakazweni uKhozi. Kuningi okusolisayo nalapho ukuthi sengathi kusebenza ikhadi elithile. Lokho kuyasilimaza ngoba kugcina kulandwe abantu abazolimaza into yethu enhle kube kushiywe abanolwazi olunzulu.
Namanje yingoba ningaboni ukuthi yini le edala ukuthi lezi zi-10 million zabalaleli lesi siteshi esasithi sifuna ukufika kuso kusekhona uBhodloza (Welcome Nzimande) yini singafiki? Zinukeni amakhwapha SABC nabaphathi boKhozi. Ngicela ukuma lapha. Senzo Maswidi kaKhakhayi Mbatha KwaSanguye (Yanguye)