Kukhalwa ngehlazo kubadlali beBucs
UQalinge ufuna ukuthambisa inhliziyo kaBaxter
UZIMISELE ngokuthambisa inhliziyo kaStuart Baxter ongumqeqeshi weBafana Bafana uThabo Qalinge ongumdlali we-Orlando Pirates ozibona kumfanele ukugijimela leli qembu lesizwe likanobhutshuzwayo laseNingizimu Afrika.
IBucs idlulele kwi- quarter final yeTelkom Knockout iguqisa iLamontville Golden Arrows ngo-1-0 esigabeni sikaLast 16 salo mqhudelwano ngoMgqibelo ntambama ePrincess Magogo Stadium, KwaMashu. UQalinge nguyena ofake le kilabhu esigabeni esilandelayo.
Uqokwe njengomdlali ovelele ngenxa yeminyakazo yakhe ebishiya abalandeli bebambe ongezansi.
Lo mdlali uthi nakuba engakafiki lapho efuna khona kodwa uhlose ukuthambisa inhliziyo kaBaxter ukuze amfake esikwatini sakhe.
“Kuyisifiso sanoma yimuphi umdlali ukuthi adlale eqenjini lesizwe, nami ngiyakufuna lokho. Ngisebenza ngokuzikhandla ejimini ngoba ngiyazi lapho ngibheke khona. Ibhadi enginalo ngelokulimala njalo. Njengoba ngisesimweni esihle nje ngifuna ukuzama ngawo wonke amandla ukuthambisa inhliziyo yomqeqeshi weqembu lesizwe ukuze angangishalazeli, angibize eqenjini lakhe,” kusho uQalinge.
UMilutin “Micho” Sredojevic ocija iBucs, uthi kuyihlazo ukuthi ikilabhu enkulu njengePirates imelwe ngumdlali oyedwa vo eqenjini lesizwe elizobhekana neSenegal emidlalweni emibili yokuhlungela iNdebe yoMhlaba ezokuba seRussia ngonyaka ozayo.
“Njengamanje simelwe nguWayne Sandilands kuphela eqenjini lesizwe ongunozinti. Yisimo esingamukelekile lesi uma niyikilabhu enkulu. Empeleni iyihlazo nje le nto yokuthi simelwe ngunozinti kuphela eqenjini lesizwe. Kodwa-ke bayaphusha abafana bami ngiyethemba ukuthi izoshintsha le nto ngokuhamba kwesikhathi,” kusho uSredojevic.
Kuyisifiso sanoma yimuphi umdlali ukuthi adlale eqenjini lesizwe...