Ngiyadumala ngeyeTheku neChiefs
NGIZOTHANDA ukuvula le ngosi ngenkulu indumalo engikuthola kunzima ukuyidlulisa emoyeni wami. Umkhandlu weTheku uncamele ukukhipha imali eshisiwe ukhokhela iKaizer Chiefs ukuba izodlala nathi umdlalo weLast 16 ye-Telkom Knockout ngoMgqibelo ebusuku eMoses Mabhida Stadium, eThekwini. Kangibhali lokhu ngenxa yokuthi sihlulwe ngo-3-0 kulo mdlalo.
Ngiyazibuza namanje ukuthi ingabe kuthini ezikhulwini zomkhandlu weTheku njengoba zilale embhedeni owodwa neChiefs kuzocindezelwa uSuthu kwazise kakusekho kilabhu yaseThekwini kulo mqhudelwano.
Okubuhlungu kakhulu wukuthi kule mali egixabezwa iChiefs ukuletha imidlalo yayo yasekhaya eThekwini kukhona ingxenye enkulu ekhokhwa wuSuthu eMabhida.
Kule nkundla siqashe amahhovisi, iPeople’s Park esiziqeqesha kuyona neHigh Performance Centre. Kubuhlungu nxa imali ekhokhwa yithina isisetshenziselwa ukondla ikilabhu yangaphandle kwaKwaZulu-Natal futhi esincintisana nayo kwiPremier Soccer League (PSL).
Izikhulu zomkhandlu weTheku kubukeka zingaboni ukuthi iChiefs ithengisa imidlalo yayo kulabo abafuna ukuyinika imali eningi kunabanye. Iqale yayisa imidlalo ePolokwane, eLimpopo, yasuka khona yaya eCape Town, eWestern Cape, njengoba manje isilapha eThekwini.
Uma kukhona umasipala ongayithembisa imali engcono kuneyeTheku, iMabhida Stadium izophinde imile utshani bese kukhunjulwa amakilabhu asekhaya.
Abanikazi bamaZulu FC bancamele ukukhipha imali enkulu bethenga ilungelo lokudlala kwiAbsa Premiership.
Phakathi kwesinye sezizathu zokuthenga leli lungelo wukuthi iTheku liqhubeke nokuba namakilabhu adlala kwi-Absa Premiership okuhambisana nezinto eziningi ezinhle. Kubi-ke nxa osomabhizinisi abazimele bekwazi ukucabanga bathenge ikilabhu (ukuze kusizakale isifundazwe) bese uhulumeni (wakuleso sifundazwe) uncamela ukuthuthukisa amakilabhu angaphandle kunawasekhaya.
Nokho-ke ngiyaqonda ukuthi nathi kumele senze kahle kakhulu enkundleni sinqobe nezinkomishi ukuze imidlalo yethu izohanjelwa yizindimbane zabantu. Mhlawumbe lokhu kuyokwenza ukuthi uhulumeni wethu ungalandi amakilabhu aseGauteng ukuba azosicindezela.
Okubi wukuthi iSharks ikhokha imali engatheni eGrowthpoint Kings Park kunekhokhwa yithina eMabhida. Kangikhumbuli kodwa abanikazi beKings Park belanda iBlue Bulls ukuzocindezela oShaka. Lokhu ngeke bakwenze abelungu, okwenza ngikholwe wuku- thi kwenziwa kithina ngenxa yebala.
Nginxusa abalandeli bethu ukuba bakhohlwe yingcindezelo esiyithole kuhulumeni wethu kwiTelkom bahlanganyele nathi siyozesula izinyembezi ngokumboza iBaroka FC esiqhathwe nayo kowePremiership ngoLwesithathu kusihlwa eKing Zwelithini Stadium, eMlazi.
Ngiyakuqonda ukukhathazeka kwabalandeli bethu ngokugqoza kwezimpahla zekilabhu. Sengithathe isinqumo sokuthi mhla ziyisi-7 enyangeni ezayo ngibhekise amabombo eSpain ngiyohlangana ngqo nezikhulu zakwaJoma ezisixhase ngezimpahla zokugqoka. Ngizokugcizelela nokuthi sifuna ukuvula isitolo esikhethekile sezimpahla zekilabhu.
Ngithanda ukugcizelela kubalandeli bethu ukuthi sizosiqinisa isikwati sethu ngokuvulwa kwewindi lokuthengwa kwabadlali ngoba kuyacaca ukuthi kunezindawo okumele ziqiniswe. Imakethe siyibheke ngabomvu. Sengiphetha, ngithanda ukudlulisa amazwi enduduzo emndenini ka-Ian McLeod obengunondweba wezinga eliphezulu kuleli osanda kudlula emhlabeni. Sikujabulele ukuthi uyeke ukudlalisa waba yifourth official. Uyenze ngobuqotho nangokwethembeka le misebenzi. Kuningi ebesisakubheke kuyena njengomuntu obesevuthiwe ekuphathweni kwemidlalo.
Kangikhumbuli abeKings Park belanda iBulls ukuzocindezela iSharks...