Umfundisi ubemdlwengula ngisho esesikhathini
Wenzelwe phansi ngumsakazi odumile
UKHALA uyazithulisa owesifazane waseMbali, eMgungundlovu maphakathi neKwaZulu-Natal, osegqigqe waze wakhathala efuna ubulungiswa ngokunukubezwa kwakhe ngabasolwa abane omunye wabo ongumfundisi odumile.
Lona wesifazane (30) - igama lakhe esiligodlile ukuvikela isithunzi sakhe - uhlale phansi neLA
walanda ngodaba lwakhe olunzima lokudlwengulwa ngabantu abane, amahlandla amaningi, kodwa uma esekhuluma ngokudlwengulwa kwakhe ngumfundisi abemethembile, emthatha njengoyise, uvele ashintshe ngisho ebusweni kubonakale ukuthi lesi yisilonda esisekude ukuphola kuyena.
Okumhlukumeza kakhulu emoyeni wukuthi kakukho lapho engakayi khona ezama usizo ngamacala amabili awavulile, elinye lawo ulivulele yena lo mfundisi amsola ngokuthi wamnukubeza amahlandla amaningi kanti elinye ulivulele owesilisa athi wamnukubeza ngesikhathi emsebenzela.
Uthi womabili la macala akazi ukuthi kuqhubekani ngawo - elomqashi uthi lingenile laba nezingqinamba eziningi kusukela ngowezi-2014 elivulile kwaze kwaba wunyaka odlule kungacaci ukuthi kwenzekani.
Elomfundisi ulivule ngoNhlangulana (June) nonyaka kodwa kuze kube yimanje kakukaze kwenzeke lutho njengoba ethi amaphoyisa amenzela phansi. Lona wesifazane uthi useke wazama nokuzibulala ngoba ebona sengathi kakukho muntu omkhathalele mayelana nesimo abhekene naso.
“Ngiqale ukudlwengulwa ngiseneminyaka emine lapho bengihlala khona ngishiywe ngumama. Ngiyasola ukuthi ugogo ubonile ukuthi kukhona okwenzekayo kumina wabe esengithatha ngahlala naye.
"Kuthe ngineminyaka eli-12 ubudala, ugogo washona ngasala ngingasenabani. Kudingeke ukuba ngihambe ngihlala emizini yabantu. Ngiqhubekile nesikole ngafunda, ngihlala emqashweni, okuthe sengifunda uGrade 11 - ngifunda ngibamba namatoho emajalidini - kuthe ngelinye ilanga ngizihambela ngahlangana nowesilisa ongibuze ukuthi kangisabi yini ukuhamba ngedwa ekuseni kangaka,” kusho yena.
Uthi lona wesilisa ukhombise ukuzwelana naye waze wambuza ukuthi uhlalaphi, wamtshela. Uthi kuthe engalindele wafikelwa ngumuntu obezimboze ubuso endlini abeqashe kuyona, wamkhiphela ummese wamdlwengula. “Ngigcine sengihamba kuleyo ndawo ngoba besengisaba kanti naye lona obenginukubezile ubengitshelile ukuthi uzobuya,” kusho yena.
Uthi uhlangane nowesilisa athandane naye wakhulelwa, okuthe uma esemtshela ukuthi uzithwele wathi makasikhiphe isisu.
“Ngenqabile ngathi ngizozikhulisela ingane. Ngithe ngiye emtholampilo ngezwa mayelana nabantu benhlangano elekelela abesifazane abakulesi simo ebengikusona ngaleso sikhathi. Basitshele ukuthi bazosisiza nangokudla, izingane zethu bazitholele abantu abangazikhulisa uma sifisa lokho,” kusho yena.
Uthi-ke ube esejwayela ukuthi uma engenakho ukudla noma uma exakeke kakhulu aye kule nhlangano. Esinye sezisebenzi zakhona singethule kumphathi walesi sikhungo (okuyilo mfundisi amsola ngokumdlwengula), okuthe ngalo lelo langa wathi uzonginika indawo yokuhlala kunokuba ngihambe ngihlala ngibe ngizithwele.
"Ngihlale kwakhe ngaze ngabeletha. Emuva kwalokho kuthe ehambele eMozambique wangifonela wathi ucela ngihambe kwakhe, ngifune indawo yokuhlala,” kusho yena. Uthi ngesikhathi ehlala kwakhe ubelokhu emncenga ukuba abuyelane noyise wengane, okuthe ngemuva kwesikhathi bagcina bebuyelene yize noma ebengathandi.
“Ngithe sengihlala ngedwa ngaphinde ngaqala phansi ngahlaselwa yindlala okuthi uma kwenzeka ngimfonele umfundisi angilethele ukudla bese elokhu engipotoza amabele.
"Ngigcine sengincamela ukulamba ngoba bese ngicasulwa wukuthi uyangipotoza. Kuze kwafika isikhathi lapho ebesezifikela yena engilethela ukudla bese elala nami ngenkani. Bengithi noma ngimtshela ukuthi ngisesikhathini alale nami ngenkani,” kusho yena.
Uthi kuqhubeke eside isikhathi waze wagcina esembalekela umfundisi ngoba ubese ehlukumezeke nangokwengqondo, esenokhwantalala oluyisimanga.
“Ngale kokhwantalala, bengino- kucasuka okukhulu kwazise lo muntu ubefana nobaba kimina futhi ngimhlonipha, ngimethemba.
"Akwenze kimina kangisoze ngakukhohlwa ngoba ungibulele ubumina,” kusho yena.
Uthi uthuthile lapho abehlala khona wayohlala 'ekubhaceni'. Esehlala lapho uhambe wayofuna amatoho kwenye indawo ekhiqiza amanabukeni khona eMgungundlovu, okuthe engalindele wadlwengulwa ngumqashi wakhe.
Uvele athuthumele uma esekhuluma ngokuvula kwakhe icala ngemuva kokudlwengulwa ngumqashi wakhe, uthi kumhlukumeze ngendlela eyisimanga.
“Ngemuva kokuvula icala, umsolwa nomndeni wakhe bebengithumelela imiyalezo bengicela ukuba ngilesule icala bethi bazonginika imali. Kuthe uma icala selingena enkantolo kwaba nezingqinamba eziyisimanga. Ngaphambi kwalokho umseshi wokuqala kangigculisekanga ngendlela asebenza ngayo ngayomceba kubaphathi bakhe.
"Nginikwe omunye umseshi naye ogcine enza izinto engingaziqondi ngoba ubengangitsheli uma kuzongena icala. Ligcine liphathwa ngowesithathu obesekhala ngokuthi ubufakazi bemiqhafazo nokunye okuningi kakusekho,” kusho yena.
Kukho konke okwenzekile uthi kuze kube yimanje akaqondi ukuthi kungani umfundisi engaboshwa ngokunjalo nomqashi wakhe.
“Kayikho inhlangano elwela amalungelo abesifazane engingayanga kuyona nengingayibhalelanga. Ngize ngabhalela nasehhovisini lomvikeli womphakathi kodwa kangikaze ngisizakale. Sengike ngazama ngisho ukuzibulala ngoba ngibona ukuthi kayikho into engiyiphilelayo,” kusho yena.
Lona wesifazane uthi uphinde wenzelwa phansi ngumsakazi wesiteshi esikhulukazi eNingizimu Afrika, omfonele embuza udaba lwakhe wathembisa ukumlekelela, kodwa kuthe uma sebexhumene nomfundisi bamjikela esiswini njengotshwala bangabe besafuna lutho oluhlangene naye.
“Babengithembise ukuthi bazongakhela umuzi ngibe nendawo yami. Bangicele ukuba ngike ngingene esibhedlela yikhona ngizokwelashwa nangokwenqondo. Ngikwenzile lokho kodwa ngabatshela ukuthi kangikhaleli kuba nendlu, ngifuna kwenzeke ubulungiswa kuphela. Ngiyacabanga ukuthi lokho kakwehlanga kahle kuyena ngoba ngithe sengimfonela ngisesibhedlela, wathi ngeke bakwazi ukungisiza,” kusho yena.
Okhulumela amaphoyisa KwaZulu-Natal, uCapt Nqobile Gwala, uthe amaphoyisa ayaphenya ngodaba lokudlwengulwa kwalona wesifazane. “Icala liphethwe ngabeFamily Violence, Child Protection and Sexual Offences Investigations FSC esifundazweni ukuba benze uphenyo,” esho mayelana necala likamfundisi. Mayelana necala lomqashi, uCapt Gwala uthi bathole ukuthi inombolo yecala lona wesifazane anayo, iveza icala lomunye umuntu - hhayi elakhe.