Inganono kucula iGcokama Elisha

UShwi noMtekhala bebethula icwecwe

Ilanga - - Izindaba - JOHN HLONGWA

KUQHUME inganono kwaba khona abalimalayo ngesikhathi kwethulwa icwecwe elisha likaShwi noMtekhala ngempelasonto ehostela iBuyafuthi, eGoli - lapho okuvela ukuthi kulimale nomculi kamaskandi, uMthandeni “Gcokama Elisha” Manqele. Nokho iGcokama lithi kalilimalanga kulesi sigameko.

Imithombo yeLANGA ithi iGcokama lihlaselwe ngabantu lisesiteji, balijikijela ngamatshe nangamabhodlela lalimala kabi ebusweni - kulimale kabi nabalandeli balo.

Eminye imibiko engaqinisekisiwe ithi kugcine kushone abantu ababili abebephuthunyiswa esibhe-dlela ngemuva kokuba oyedwa egxobeke kabi omunye wadubuleka.

UMnu Bongani Manyathi ongumphathi kaShwi noMtekhala - obekuyibona abebehlele umcimbi wokwethulwa kwecwecwe labo le-14 elithi “Emkhathini” uthe:

“Abantu bebebaningi ngokweqile emcimbini, okugcine ngokuba bangalawuleki. Bangene esiteji bagida noMthandeni, yilapho kuqale khona ukuxabana kwabantu.

“Indaba yabalandeli ngeke siyigqamise kakhulu, ngabathandi bakamasikandi abebelaphaya. Ngisizwile isibhamu siqhuma abantu babaleka kodwa kakukho engikuzwile okuthinta ukuthi kukhona oshonile.

“IBuyafuthi yindawo esijwayele ukuyisebenzisa ukuyokwethula umsebenzi omusha kaShwi noMtekhala, kodwa ngonyaka ozayo ngeke siwuyise khona sizobheka enye indawo,” kuphetha uManyathi.

IGcokama Elisha likhala ngenjabulo egabhe abalandeli balo baze behlulwa wukubekezelelana, balwa bodwa. Lilandisa ILANGA ngokwenzekile, lithi:

“Ngifike ngadlala ingoma eyodwa engibophele kuyona uShwi noMtekhala, ethi “Amakhekhe Anophoyizeni” ngadonsa izinhlamvu ezikuyona ezithi umbulaleni, abantu bajabulile nje kodwa baqhubeka bama lapho bebevele bemi khona.

“Inkinga iqale sengidlala eyesibili ethi “Intombi Yomlungu” abantu bavele baphusha ucingo bangena ngaphakathi beza esiteji bagida nami, kwaqala ukungezwani bajikijelana bodwa.

“Ngigcine ngilandwa ngabaqaphi. Ngesikhathi bengiyisa emotweni, ngizwe sekuqhuma isibhamu kodwa sizwakala ukuthi sishaya emoyeni. Namahlebezi okuthi kunezingoma ezindala engizidlalile ezinochuku, kayikho leyo nto mina, ngidlale izingoma ezimbili kuphela, nazo eziphuma kwi-albhamu yami elandelayo engakabi ngisho nesihloko,” kusho iGcokama.

Okhulumela amaphoyisa aseKatlehong South, uKpt Mega Ndobe, uthe bazwile ngesigameko saseBuyafuthi kodwa wathi imininingwane ephelele akakabi nayo uzoze aphawule ngaso uma esethole umbiko ophelele.

Ngesaikhathi bengiyisa emotweni, ngizwe sekuqhuma isibhamu...

Newspapers in Zulu

Newspapers from South Africa

© PressReader. All rights reserved.