KUVELA IZINDABA EZINTSHA EZISHAQISAYO NGONKOSAZANA DLAMINI-ZUMA NOMSHUSHUMBISI KAGWAYI
KUVELA izindaba zokuthi uDkt Nkosazana “NDZ” Dlamini-Zuma, ogaqele isikhundla sokuhola i-African National Congress (ANC) emuva kwengqungquthela elindelwe ngamehlo abomvu nonyaka ngoZibandlela (December), uke wahlangana izikhathi ezingaphezu kwesisodwa nosomabhizinisi ozivumele ngowakhe ukuthi ushushumbisa ugwayi, uMnu Adriano Mazzotti, ongumqondisi wenkampani kagwayi, iCarnilinx.
UMnu Mazzotti - okuvela ukuthi weseka ngenkece umkhankaso kaDkt Dlamini-Zuma wokuqhoqhobala esokuhola i-ANC - uthe yena ubonane kwaba kanye noDkt Dlamini-Zuma. Iphephandaba langeSonto, iSunday Times, libike ukuthi kunezithombe ze-Instagram eziwubufakazi bemihlangano emibili phakathi kukaDkt Dlamini-Zuma noMnu Mazzotti kanti esesithathu siveza ubhululu kaMnu Mazzotti angana noDkt Dlamini-Zuma - kubikwa ukuthi sona sithwetshulwe eGreece.
Lezi ezinye ziveza uMnu Mazzotti nalo mholi beseLondon, e-England naseSandton eNingizimu Afrika. Kwesinye sazo isiqumama kwezokugembula, uMnu Philip Anastassopoulos, siyababaza sithi:
“Lwaze lwaba mnandi usuku sihlangene nomama uZuma.” Ngesonto eledlule uMnu Mazzotti uthe yena usabonane kanye vo no-Dkt Dlamini-Zuma nokho izithombe nolunye ulwazi olusha kukhomba ukuthi ubesenga ezimithiyo.
Uphikile futhi nokuthi weseka ngemali umkhankaso walo mholi. UMnu Mazzotti neziqumama kwe- zokugembula, uMnu Philip noMnu Photios Anastassopoulos - abangabanikazi beSupabets - kuthiwa ngokuqala kwalo nyaka bake bavakashisa uDkt Dlamini-Zuma e-United Kingdom (UK) naseGreece, beyonxenxa ukwesekwa kwakhe ngemali ukuze avivele ukudla umhlanganiso ngoZibandlela.