INKOSI ILANGA YAYIHLAKANIPHILE FUTH
SIYIQHUBA kweyangeledlule lapho sigcine sikhuluma ngokuzalwa kweNkosi iLanga (Galilee Shembe). INkosi yayingumntwana ohlakaniphileyo kakhulu futhi osithandayo isikole. Yona nomfowabo ubaba u-Amos K Shembe baqhubeka bayofunda esikoleni esasikuTaylor Street, esasiphethwe nguMnu Ephraim Vilakazi waseGroutville. Ukudlula lapho inkosi yaqhubekela eDwaleni naseMalvern phansi kukaNkz Hoover, owayengumphathisikole.
Emuva kwalokho yaya e-Adams College, nakhona lapho yaphasa yaqhubekela enyuvesi yaseFort Hare. Lapho-ke yayisihambisana nezinye izinsizwa oMnu Selby Ngcobo noMnu Pasco Bophela sebeyokwenza iziqu zeB.A. Yasuka eFort Hare yabuyela e-Adams College isiyofundisa.
Kwathi ngaleso sikhathi isafundisa ngowe-1933 kwahamba uthishanhloko wakhona, USolwazi Matthews, inkosi yathatha isikhundla sakhe ineminyaka engama-28 yokuzalwa. Kuthe ngokukhothama kukaShembe (uMprofethi Isaiah Shembe onguyise weNkosi yaseKuphakameni, iLanga) mhla zimbili kuNhlaba (May) we-1935, iNkosi iLanga yabuyela eKuphakameni ukuzoqhuba umsebenzi kayise.
INKOSI ITHATHA UMSEBENZI WOKUHOLA IBANDLA
Inkosi yamenyezelwa ukuthatha umsebenzi webandla ngoNhlangulana (June) we-1935, imenyezelwa wummeli kaShembe, uMnu. D.G. Shepstone. Ukukhothama kukaShembe kwanika abantu abaningi ikakhulukazi abefundisi bezinkonzo zamaKrestu ithemba lokuthi sekuphelile ngobuNazaretha.
Ukuthatha umsebenzi webandla kwenkosi kakwehlanga neze kahle kubantu ababeyizitha zobuNazaretha kangangoba abefundisi abathile beza bazoyibuza ukuthi ngempela iyawuqhuba yini lo msebenzi, bayithembisa ukuyiyisa emazweni aphesheya nezikhundla ezinkulu emabandleni abo, abanye bayethembisa nokuthi bazoyiyisa phesheya iyofunda khona bese kuthi uma seyiqedile ibuye izoba ngumengameli wamabandla abo.
Konke lokho inkosi yakuchitha, yaqhuba umsebenzi kaShembe - okwakuthiwa mayiwuyeke ufe uphele ngoba vele ngoweziqhaza. Abanye abantu abayihlupha kakhulu iNkosi iLanga ngesikhathi ithatha umsebenzi, kwaba ngabefundisi bayo eyabafica begcotshwe nguShembe. Kukhona amazwi adabukisayo inkosi eyawakhuluma enkonzweni kaNdasa ngowe-1974 emzini wayo waseGospel emuva kokuthola incwadi eyayivela kuMntwana waKwa- Phindangene, iNkosi Mangosuthu Buthelezi, eyibikela ngencwadi ayesanda kuyithola ivela kubantu ababengamalunga eBandla lamaNazaretha.
Kule ntshumayelo inkosi ithi, “Angazi noma njengoba silapha singabakaShembe sonke yini noma sekukhona abakaSathane, kodwa ngiyasola sekukhona nabakaSathane. Kulezi zinsuku ngithole incwadi ivela kwabakwaZulu ithi bathole incwadi ivela eBandleni lamaNazaretha ibhalelwe bona, ithi: Nina bakwaZulu sisizeni nisikhiphele uShembe eKuphakameni. Nisikhiphele yena aphume eKuphakameni abe ngaphandle komuzi".
Le ncwadi inkosi yayiyithole ngowe-1974. Eminyakeni embalwa nje kusuka lapho yabe isiyakhothama. Ithi inkosi uMntwana waKwaPhindangene uthi laba ababhale le ncwadi kabayisayinanga. Kwenye intshumayelo yayo ikhuluma ngokuqala kwayo ukuhola iBandla lamaNazaretha isemzini wayo waseGospel ngoNdasa we-1974, ithi:
“Mzukwana ubaba ehambayo, kwabakhona amantombazane amadala ayethi ahlakaniphile, ayesebeka abefundisi ngasese esebathungela nezingubo eziluhlaza; asazi nokuthi lo uzoba sesikhundleni sikaShembe, lona uzoba yisekela lakhe. Sasingazi lutho ukuthi uShembe ubhaleni kubameli, nami ngangingazi. Ngangithi abefundisi bazokhethana nje phakathi kwabo bona bodwa, lowo abamkhethayo-ke bese kuba nguyena kodwa, kuthe kungakenzeki lokho njengoba la mantomazane