Makaxolise uSimelaneZulu ngakushilo
KUYACACA ukuthi kusamele iNingizimu Afrika isebenze kanzima ukulwa nesihlava sokucwasana kwezakhamizi zayo ngazindlela zonke. Kuyadabukisa ukuzwa ukuthi amalunga e-African National Congress (ANC) esiShayamthetho saKwaZulu-Natal abechapha ngenhlamba aweDemocratic Alliance (DA) ngesikhathi le ndlu igubha iqhaza likaMnu Oliver Tambo emzabalazweni wenkululeko.
Ngokwesitatimende esikhishwe nguNkz Mbali Ntuli weDA ngoLwesihlanu, la malunga e-ANC okuvela ukuthi bekukhona kuwona noNdunankulu waKwaZulu-Natal, uMnu Willies Mchunu, aze esabisa ngokwenzakalisa izimbangi zawo. Okubi kakhulu-ke okukulesi sitatimende wukuthi uSihlalo we-ANC kwezoLimo esiShayamthetho, uNkk Nomagugu Simelane-Zulu, kuthiwa ubuze ilunga leDA, uDr Imraan Keeka, ukuthi yindoda enjani egqoka ingubo - esho ngoba uDkt Keeka egqoke umjiva wamaSulumane.
Yize uNkk Simelane-Zulu ephika ukuthi ukushilo lokho - uthi uthe yiqhaza likaMnu Tambo elisize ekubeni bakhululeke (iDA) futhi uDkt Keeka ngabe akaligqokile leli lokwe (elisuse umsindo) namhlanje ngoba ezenkolo bezicindezelwe ngesikhathi sobandlululo.
Ukhala ngokuthi ucashunwe kuphuthunywa. Siyafisa ukumkholwa uNkk Simelane-Zulu kodwa sizwa kunzima ukukwenza lokho. Ake sithi-ke siyakholwa wukuthi uNkz Ntuli umcaphune ngesinxele, khona ukuthi uMnu Keeka ngabe akagqokile ilokwe kuhle yini? UNkk Simelane-Zulu uyakhumbula yini ukuthi inkolo yobuNazaretha isungulwe ngowe1910 kubusa uhulumeni wamaNgisi kwadlula kwaya kowamaBhunu, kwaze kwaba ngowentando yeningi kodwa imiNazaretha, eyakhiwe njengemijiva yamaSulumane ibigqokwa, njengoba isagqokwa namanje?
Ukhuluma indaba yobandlululo olwalucindezele ezenkolo kodwa nawo amaSulumane abekhonza ngendlela yawo ngaphansi kwawo uhulumeni wengcindezelo, egubha izinsuku nezinyanga ezithile ngendlela yawo. Ngokunjani lokhu kucindezelwa kwezenkolo umholi ohloniphekile akhuluma ngakho uma ingcindezelo kungekhona ukuthi izinkolo zokufika e-Afrika zinamaholidi, kuma yonke into ngazo, kodwa eyobuNazaretha engeyokudakuba eNingizimu Afrika kayinalo ngisho nelilodwa.
Kunemigidi, yimigubho nezikhumbuzo zabaholi kodwa kakukho ngisho nokukodwa okuyiholidi ekhalendeni lakuleli. Osopolitiki leli bandla balikhumbula njalo uma kunokhetho.
Kasilwi nezinkonzo ezithile kodwa sibona kumele ukuba uma osopolitiki bekhuluma, bawacwecwe amazwi abo - ikakhulukazi ngezenkolo ngoba ziyinto esemithanjeni yegazi kwabazilandelayo. Kuyasidabukisa ukuthi amazwi afana nalawa ayamaniswa nelunga le-ANC, okuyiqembu elihlala likhala njalo lizwakalisa ukulwa nokucwaswa kwabanye abantu - ngisho nanoma ngaluphi uhlobo.
Sibona kumele uNkk Simelane-Zulu axolise ngakushilo, ngeke kufe muntu, kunalokho siyomshayela ihlombe njengomholi okwaziyo ukuvuma iphutha - okuyomenza abe ngumuntu osondelene nokwethembeka. Kasisakhulumi nje ngokuthi yena akashongo ukuthi yindoda enjani egqoka ilokwe kodwa nokuthi athi ukube bekungelona iqhaza likaMnu Tambo ngabe uMnu Keeka akaligqokile, kakuyona inkulumo enambithekayo.