Uzifundise isigingci esintshontsha
UDONSE kanzima emculweni kamasikandi efukula abaculi abaningi kodwa ezakhe izinto zingacaci ekubeni eshaya ingoma esezingeni eliphezulu.
UMnikezwa Ngubane (31) waKwaJikijiki, KwaMaphumulo, enyakatho-mpumalanga yeKwaZulu-Natal, uyahlonishwa kakhulu ngokucula kamnandi, ikakhulukazi ngokuphelezela ngamaphimbo.
Ikhono likhulu kakhulu njengoba kunguyena olekelele uMjikijelwa “iChalaha likaShafuza" Ngubane ngesikhathi engena kwezomculo waphinda wamqeqesha nangokudlala isigingci.
Le nsizwa ilamana nalo ngqo iChalaha emhlane kunina oyedwa - bashiyelane ibele. Namhlanje ILANGA likuthatha likubeka ngoMnikezwa.
Le nsizwa uma izihasha izisho kanjena: “Usinga lwendoda Abathe bayalunqamula eDobsonville behluleka, Kuye kwananela naseJabulani behluleka. Ukhamba oluncane umancishana Kodwa liphuza lenele ibandla, Isihlahla sofenisi Esingangeneki sdalo, Esigqize ngameva wonke umzimba. Umnyovu otinyela utakalane Waphuthutheka maqede Wakhala ngoyise wathi, Kodwa baba wangiqhatha Nomnyovu bekade ngiyini Mina njengoba igoba omakade ebona‚" UMnikezwa uthi ngesikhathi engena emculweni uqhamuke nengoma enkulu kwasekuba khona abazama ukumsoconga, bebulawa wumona wokuthi umculo wakhe uyalaleleka.
Utshele ILANGA ukuthi langa limbe uhlaselwe wukugula esiteji enandisa eJabulani eGoli, waquleka phambi kwabantu ngenxa yemibango yakhe nozakwabo abenabo enkampanini.
Bebebona sengathi yena unakekile kubantu yingakho ethi yena ungusinga abahluleke bethi bayalunqamula. Uma eqhubeka nezihasho zakhe, uzifanisa nesihlahla sofenisi okungangeneki kusona ngenxa yobungozi bakhe ngengoma emnandi aphinde atinyele bonke abamthatha kalula.
UMnikezwa sekunesikhathi eside eyibambile emculweni kamasikandi njengoba ethi isiphiwo sakhe siqale ukubonakala esafunda amabanga aphansi esikoleni.
Bekuthi uma kuculwa kwaziwe ukuthi nguyena ohola phambili ikhwaya esikoleni. Umculo uwufundiswe ngokwamanothi esikoleni kwathi ngokuhamba kwesikhathi walandela umasikandi ngoba umfowabo okunguMjikijelwa, ubeseqalile egidela UKwakhe “Mgqumeni" Khumalo, iBhova LikaDikadika (elingasekho).
Utshele ILANGA ukuthi bekuthi uma kufike iBhova kubo kwaNgubane KwaMaphumulo lihamba neChalaha limuzwe uma eziculela lize lisho ukuthi uzokhula eyingozi kakhulu kodwa bese limkhuthaza ngokuthi makaqede isikole kuqala uma efuna ukugxila kwezomculo.
“Ngiwuthanda kakhulu umasikandi, bengize ngintshontshe isigingci sikamfowethu esiyiwele naye ngoba yena ubekwazi ukusidlala kodwa engafuni ukungifundisa.
“Bekuthi uma eyodlala ibhola ngisintshontshe ngizame ukusidlala futhi ngikhumbula kahle ukusidlala ngifunde ngengoma yaMagcokama KaMgqumeni ethi "Sawubona Sawubona" ngoba bengiqaphela konke okwenziwa yiBhova nami ngikwenze.
“Akazange akholwe ngelinye ilanga umfowethu esezwa ngisidlala wabuza ukuthi ngifundiswe ngubani, ngamtshela ukuthi bengisintshontsha,” kusho uMnikezwa.
Uqede umatikuletsheni eMakhosonke High School ngonyaka wezi-2006 wabe eselibangisa eGoli ngonyaka olandelayo waqala wagxila kwezomculo, ezipatanisela.
Uzame ukufuna inkampani ezoqopha umsebenzi wakhe. Akabanga nayo inhlanhla emculweni ngonyaka wezi-2007 nowezi- 2008.
Ngonyaka wezi-2009 usizwe ngomunye usomatekisi ngemali ukuze akwazi ukuqopha i-albhamu yokuqala ethi "Uthule Uthini Ubaba" ngaphansi kwegama abaKwaMbomvu. Kuwona lowo nyaka uMjikijelwa ubesezinhlelweni zokuhlubuka kwiBhova wasizwa nguyena uMnikezwa ngokumvumela ezingomeni zakhe, wamdlalela nentambo, wabamba iqhaza nasekubhalweni kwezingoma.
UMnikezwa nguyena ofundise iChalaha intambo basizana kwialbhamu yalo ethi “Sihlupheke Sonke”.
Ngonyaka wezi-2010 ubuyile esezibiza ngoMnikezwa kwi-albhamu ethi “Agreement” kanye neqembu elibizwa ngokuthi AbakwaVezi nakuba lingagqamanga.
Uqhubekile wakhipha nelinye iqembu ezibiza ngeSimakwana sikaShafuza okuyi-albhamu ethi “Iqiniso Alikho” ngaphansi kwenkampani ka-Ali Mgube wamaSAP.
Uqale ukugqama kakhulu nyakenye nge-albhamu ethi “Ngizozenzela” kanti kulo nyaka ukhiphe ethi “Ngeke Sibayeke” ngaphansi kweSimakwana sikaShafuza neDVD ephume ngesonto eledlule ehlanganisa zonke izingoma ngokwehlukana kwama-albhamu.
Utshele ILANGA ukuthi ukuphela kukaLwezi (November), uzodedela enye albhamu kaMnikezwa.
“Mina kangiculanga ngoba ngibona abathile kodwa le nto isuka ngaphakathi kimina, yingakho ngizibiza ngenkosi yabavumi ( backing vocalists) ngoba umculo ngiwenza ngilandela inothi futhi ngenzela ukuthi nozama ukungilisa athwale kanzima. Sengiqophe i-DVD ngithi abantu mabayithenge babone kahle ukuthi ingoma ngiyayishaya,” kusho uMnikezwa.
Usevule inkampani yakhe yomculo ebizwa ngeMnike Music Production ngenhloso yokuthuthukisa amaciko asafufusa njengoba ethi uyalwazi usizi lokudonsa kanzima ehluphekela inkampani.
UMnikezwa nguyena ophelezela ngephimbo naseqenjini oNdabuzekwayo, elekelelana noJaivazimnike kanti nakwiGeza lakwaMgube kwi-albhamu ethi “Ngizodlala Nobani” nguyena nakhona.
Ukhale kakhulu ngokungenziwa kobulungiswa ngabahleli bemicimbi njengoba ethi bamema abaculi ababodwa minyaka yonke ngaphandle kokuba babheke ikhono lomculi.