ESAMAGUNDANE KUMQEQESHI WELE-PSL
UPHUME ngesamagundane umqeqeshi woMthatha Bucks ezakhe zicazelana amaphuzu kuba ngu-1-1 kokaNational First Division (NFD) ngoMgqibelo ntambama eMthatha Stadium, e-Eastern Cape.
ILANGA lihoshe ngomthombo walo ongashayi eceleni ukuthi u-Ian Palmer ocija uMthatha uphume ngesamagundane abalandeli bemuchapha ngenhlamba esabisayo ngemuva komdlalo.
Abalandeli kuthiwa bebecikwa yindlela ikilabhu elahla ngayo amaphuzu emidlalweni okufanele ngabe iyayinqoba ikakhulukazi eyasekhaya.
Kuthiwa abalandeli balibeke ngesihloko elokuthi abasamfuni lo mqeqeshi le kilabhu kufanele ibaqashele omunye.
“Yimbi lento yokugijinyiswa kabuhlungu ngamakilabhu amancane ekubeni sinabadlali abahle.
"Okuhle kakhulu wukuthi ngale mpelasonto kayikho imidlalo ekhona kwazise isonto leFederation of International Football Association (Fifa),” kusho lo mthombo oveze ukuthi bafuna uRoger Sikhakhane obecija iRichards Bay FC azoqhubeka nomsebenzi.
Imizamo yokuthola uLuxolo Matikinca oyimenenja yoMthatha iphunzile kwazise ucingo lwakhe belukhala kodwa lungabanjwa kwaze kwashaya isikhathi sokuyogaya.
Khonamanjalo iRoyal Eagles ibuye nephuzu idlala ngokulingana neWitbank Spurs kuba ngu-1-1 koweligi ngoMgqibelo ntambama ePuma Stadium, eWitbank.
I-Eagles iyona ebone imbhobo yamapali ngesikhathi uBoikanyo Komane ebeka enethini igoli obekuyiphenathi ngomzuzu we-12, kwathi eleSpurs lona leza noThabo Makhele umdlalo usuyophela.
Ngesikhathi i-Eagles izabalaza ukuthola amaphuzu aphelele ekuhambeni iReal Kings yona ibuye naphelele ihlula iCape Town All Stars ngo-1-0 wegoli likaS’phesihle “Arigogo” Nzimande e-Athlone Stadium, eCape Town.
IRichards Bay FC kubukeka seyizoduma ngokudlala ngokulingana kulesi sigaba kwazise nangoMgqibelo ibanjwe yiMbombela United ngo-0-0 ekhaya ekubeni iMbombela kayinamqeqeshi inezinkinga.
Kubukeka uSfiso “Jomo” Biyela kumele ayibhekisise lendaba yokwehla kwezinga kwezakhe ngoba uma engabhekile uzozibona eselwa nokuvika izembe emsileni.
Isiyonke imiphumela yemidlalo yeNFD ebingempelasonto ihambe kanje:- Cosmos 2, Leopards 1; Tuks 1, uThongathi FC 0; Highlands 3, Stellenbosch 0; Richards Bay 0, Mbombela 0; CPT All Stars 0, Real Kings 1; Spurs 1, Royal Eagles 1; Mthatha Bucks 1, Super Eagles 1; Tshakuma 1, uBuntu 0.