OWE-MARITZBURG UTD USOLA I-DOWNS NGOMHOBHOLO
UMNIKAZI weMaritzburg United uFarook “Ntshebe” Kadodia usola iMamelodi Sundowns ngomhobholo njengoba inqabe ukumnika umdlali yancamela ukumduvisa ekhaya.
IMaritzburg idonsa kanzima kulezi zinsuku njengoba imiphumela inqaba.
Iphansi emsileni we-log kangangoba izingqapheli zebhola ziyithipha ukugencwa yizembe.
Leli phephandaba lithole ukuthi le kilabhu imatasa ithungatha umdlali ogijima opho- ndweni lwesokudla emuva nakulona lolu phondo phambili.
Isizathu esenza le kilabhu ifune umdlali wasophondweni lwesokudla emuva wukuthi uKwanda Mngonyama obedlala kule ndawo ngesizini eyedlule ubuyele kwiSundowns njengoba ubebolekisiwe.
IMaritzburg ike yazama ukuphinde imboleke lo mdlali nangale sizini kodwa iDowns yanqaba.
Njengamanje uhleli akadlali. Leli phephandaba lishayela uKadodia ngalolu daba usole iSundowns ngokuba nomhobholo.
“Kula masizini amathathu edlule uMngo- nyama besilokhu simboleka kungenankinga kodwa manje bavele basebenzisa umona bafuna imali.
"Bangifune uR4-million ngoMngonyama ukuze banginike yena unomphelo.
"Ngeke ngikwazi ukukhipha imali engako ngomdlali oyedwa, asinabo abaxhasi.
"Okungiphatha kabi nje wukuthi umfana uhleli ikusasa lakhe liyacekeleka.
"Kodwa-ke sizophuma umkhankaso wokuthola umdlali wasophondweni lwesokudla emuva nasohlangothini lwesokudla phambili ngoba yilapho esixega khona okwamanje,” kusho uKadodia.