Kucishe kwaphuma isidumbu koweTKO
UKhune noLentjies baphuthunyiswe esibhedlela
KUCISHE kwaphuma izidumbu zabadlali ababili iKaizer Chiefs idlulela kwi- semi final yeTelkom Knockout iguqisa ngo-1-0 iChippa United kwi- quarter final yalo mqhudelwano izolo ngeSonto ntambama eNelson Mandela Bay Stadium, eBhayi.
Igoli okunqobe ngalo iChiefs kube yiphenathi ebekwe enethini nguBernard Parker ngomzuzu wama-30.
Lo mdlalo uphele kumuncu u-Itumeleng Khune ongunozinti weChiefs noKurt Lentjies odlala esiswini kwiChippa bephuthunyiswa esibhedlela kunzima.
ULentjies nguye odale umonakalo edonsa uKhune ngentamo bayosacazeka bobabili phansi balala unomphelo.
Leli phephandaba lithole ukuthi uKhune ushayeke kabi ngentamo kwanqamuka umoya waphinde wazoshayeka esweni eligcine ngokuvuvukala.
ULentjies yena ushayeke ngentamo naye okubikwa ukuthi bekunzima ukuphefumula kahle.
Baphuthunyiswe esibhedlela isimo sabo sibucayi.
USteve “Mphathi” Komphela ololonga iChiefs uthi akazi kuzogcina kwenzakaleni ngoKhune umincile.
Nokho akamincile yedwa njengoba nomqeqeshi weqembu lesizwe lakuleli iBafana Bafana uStuart Baxter ebambe umoya kwazise uKhune ubhekwe ukuvimba ngempelasonto lapho iBafana izobhekana neSenegal kowokuhlungela indebe yoMhlaba engonyaka ozayo.
“Ngizamile ukuthola ukuthi ulime- le kangakanani kodwa ngangathola into eqondile ngizwe nje ngomunye wabosizo lokuqala ethi ihlo livuvukele.
Kungabe sinebhadi elikhulu kabi uma singalinyalelwa nguKhune kulesi sikhathi esimdinga ngaso kangaka.
Kukhona konke lokho ngijabule ngokuthi sigcine siwunqobile lo mdlalo.
"IChippa isinike umdlalo onzima futhi besikulindele lokho.
"Ngifisela inhlanhla umqeqeshi wayo uTebogo Moloi ukhombisile ukuthi uhlakaniphile.
"Ngimfisela inhlanhla njengoba esemusha ekuqeqesheni,” kusho uKomphela.
UMoloi uzwakalise ukungenami ngendlela ezakhe ezihlulwe ngayo.
Uzwakale esola ugcobho ngephenathi enikwe iChiefs.
“Angiyena umuntu okhononda ngonondweba futhi angizimisele ukukhononda ngabo.
"Kodwa engikubone namhlanje kungikhumbuze ngezikhathi zami ngisadlala iChiefs yayivamise ukusihlula ngendlela engaqondakali.
"Kubuhlungu ukuhlulwa ngalolu hlobo akubekezeleleki.
"Kodwa-ke iyona ndlela kuphela lena iChiefs engangihlula ngayo ayikho enye,” kusho uMoloi.
Emuva kwalo mdlalo kube sekuqathwa amakilabhu azodudulana kumasemi final azokuba ngempelasonto yomhla zili-18-19 kuLwezi (November).
IPolokwane City itonyulwe ekhaya neBloemfontein Celtic, iBidvest Wits yona yatonyulwa ukubhekana ekhaya neChiefs.
Kungabe sinebhadi elikhulu kabi uma singalinyalelwa nguKhune...